कोशीमा गठबन्धनले दाबी गर्नुअघि नै प्रदेश प्रमुखलाई एमालेको ध्यानाकर्षण, सभामुखलाई गनिए अमान्य

विराटनगर । नेकपा एमालेले कोशी प्रदेशले सभामुख बाबुराम गौतमलाई समेत जोडेर गठबन्धनले बहुमत सिद्ध गर्न खोजेको भन्दै प्रदेश प्रमुखको ध्यानाकर्षण गराएको छ । सभामुख गौतम हाल कुनै पनि दलको सदस्य नभएको र सरकार गठनमा गणना गरिए कानून, संसदीय मूल्य मान्यता र अन्तर्राष्ट्रिय सिद्धान्तविपरीत हुने भन्दै एमालेले प्रश्न उठाएको हो ।

सभामुख गौतमलाई माओवादी गनेर ४७ सांसदको हस्ताक्षर लिएर गठबन्धन दल साढे ४ बजे सरकार गठनका लागि दाबी गर्न जाँदैछन् । त्यसअघि एमाले संसदीय दलका नेता हिक्मत कार्की र राप्रपाका नेता भक्ति सिटौला प्रदेश प्रमुख परशुराम खापुङ्गकोमा पुगेका छन् ।

नेकपा एमाले कोशी प्रदेश संसदीय दलका नेता हिक्मत कार्कीले हस्ताक्षर गरेको ज्ञापनपत्रमा सभामुख बाबुराम गौतमले २०७९ पुस २८ गते सदनमै माओवादी त्यागेको घोषणा गरेको स्मरण गराइएको छ ।

ध्यानाकर्षण पत्रमा भनिएको छ, ‘यसले स्वयम् सभामुखको गरिमामा समेत प्रश्न उठ्नेछ ।’

संसद्‍मा भएको अंकगणित तथ्य, प्रमाण र विश्लेषणको आधारमा सभामुख कुनै निश्चित दलको संख्यामा गणना गरी सोही आधारमा प्रदेश सरकार गठन प्रक्रियामा बहुमत देखाए संविधानका मर्मविपरीत हुने ध्यानाकर्षण पत्रमा उल्लेख छ । पत्रको बोधार्थ सभामुखलाई पनि दिइएको छ ।