कमेडी च्याम्पियनका विशाल र विक्कीविरुद्ध निर्देशक गिरीको उजुरी, किन मागे जीउधनको सुरक्षा ?

काठमाडौं । फिल्म निर्देशक राजु गिरीले टिभी रियालिटी शो ‘कमेडी क्लब विथ च्याम्पियन’ का होस्ट विशाल भण्डारी र निर्देशक विक्की अग्रवालविरुद्ध उजुरी दिएका छन् । जीउधनको सुरक्षा गरिपाउँ भन्दै उनले जिल्ला प्रशासन कार्यालयमा आज लिखित निवेदन दिएका हुन् ।

कमेडी च्याम्पियनको तीन दिनअघि प्रशारित ६९ औं एपिसोडमा आफ्नो चलचित्रलाई घोचपेच गरिएकोमा गिरीको आक्रोश छ । उनले काठमाडौंका मेयर बालेन्द्र साहमाथि आधारित रहेर फिल्म ‘मेयर साब’ निर्माण गर्ने तयारी गरेका छन् ।

गिरीले निर्देशन गर्ने भनेको सो चलचित्रलाई लिएर सो कार्यक्रममा कमेडियन सुन्दर खनालले व्यंग्य गरेका थिए । उनको कमेडी यस्तो थियो ।

‘निर्देशक राजु गिरीले बालेन साहको कथामा चलचित्र मेयर साब बनाउने भएका छन् । कल्ले ? राजु गिरीले १(रोक्किएर अनुहारको हाउभाउ बिगार्दै) । यसमा बालेन साह भन्छन्– हिन्दी फिल्म त रोकेँ रोकेँ, यस्तै फिल्म बन्न थाले भने नेपाली पनि रोक्दिन्छु लुजा ।’

खनालको यो व्यंग्यमा दिपाश्री निरौलाले ‘आगो आगो…’ भन्दै हौस्याउँछिन् भने कार्यक्रमकी अतिथि करिश्मा मानन्धरले पनि थम्स अप गरेर समर्थन जनाउँछिन् । तर, यस्तो प्रस्तुतले आफ्नो मानमर्दन भएको निर्देशक गिरीको टिप्पणी छ । ‘हामीले एउटा फिल्म बनाउन धेरै रिसर्च र मिहिनेत गरेका हुन्छौं । यस्तो हचुवा व्यंग्यले हामीलाई धेरै असर गर्छ । फिल्मकर्मीहरुले त्यसै आत्महत्या गरिरहेका छैनन्,’ उनले नेपाल प्रेससँग भने ।

तर, टेलिभिजन कन्टेन्टको विषयमा असन्तुष्ट हुँदा उनले शान्ति सुरक्षा दिलाइपाउँ भनेर निवेदन किन दिए ? गिरीले वकिलको सल्लाहअनुसार गरेको बताए ।

‘हुन त अदालतमै गएको भए पनि हुन्थ्यो । तर, एउटै इन्डष्ट्रीभित्र रहेको मानिसलाई जेलै हालौं भन्ने मेरो मनसाय होइन । त्यसैल वकिलसँगको सल्लाहमा जिप्रकामा उजुरी दिएको हुँ,’ उनले भने ।

तपाईंलाई सुरक्षा खतरा छ र ? भन्ने प्रश्नमा उनले अक्मकाउँदै भने, ‘अँ, नचिनेको नम्बरबाट फोनहरु पनि आइरहेका छन् ।’

राजु गिरी उनै निर्देशक हुन् जसले अर्चना पनेरुलाई लिएर फिल्म ‘जिस्म’ बनाएका थिए । अहिले उनले बालेनमाथि फिल्म बनाउने घोषणा गरेका छन्, तर यस विषयमा बालेनसँग स्वीकृति भने लिएका छैनन् ।

गिरीले भने, ‘बालेनमाथि आधारित फिल्म हो तर उहाँको बायोपिक होइन । एउटा मेयर यस्तो हुनुपर्छ भनेर देखाउन खोजेको हुँ ।’