चलचित्र ‘जुलेबी’ भदौ १ गतेबाट प्रदर्शनमा आउने

काठमाडौं । चार महिला पात्रको प्रेमकथामा आधारित चलचित्र ‘जुलेबी’को प्रदर्शन मिति फाइनल भएको छ ।

चलचित्र आगामी भदौ १ गतेबाट देशभर प्रदर्शनमा आउने तय भएको छ । निर्माण टिम र वितरण कम्पनी डिसीएनबीच कागजी सम्झौता संगै प्रदर्शन मिति सार्वजनिक गरिएको हो ।

चलचित्रको डिजिटल राइट्स पनि बिक्रि गरिएको छ। डिएआर मुभिजले ‘जुलेबी’ को डिजिटल राइट्स खरिद गरेको हो। डिएआर मुभिजका श्याम धिताल र चलचित्रका कार्यकारी निर्माता नवीन भट्टबीच डिजिटल अधिकारको सम्झौता सम्पन्न भएको हो।

चलचित्रको शीर्ष भूमिकामा उषा रजक, सुरक्षा पन्त, निशा अधिकारी र मोनिका थापा छन्। चलचित्रमा सुशील सिटौला, पुष्कर कार्की, तुफान थापा लगायतका कलाकारको पनि अभिनय रहेको छ। एन्थोलोजी जनरामा निर्माण भएको चलचित्रले तीन घटनालाई चित्रण गर्ने कार्यकारी निर्माता नवीन भट्टले जानकारी दिए । ‘यी तीनै घटना लभस्टोरी कथावस्तुमा आधारित छन्’, भट्टले भने ।

फोर क्युब इन्टरटेन्मेन्टको ब्यानरमा निर्माण भएको चलचित्रलाई गणेशदेव पाण्डेले निर्देशन गरेका हुन् । यसअघि उनले मञ्जरी, गाजा बाजा फिल्मको निर्देशन गरेका थिए ।

विवेक खड्काको छायांकन र अन्जय खड्काको सम्पादन र साउण्ड डिजाइन उत्तम न्यौपानेको रहेको छ । चलचित्रको निर्माता आभा शर्मा नेपाल हुन् । चलचित्र ‘जुलेबी’को केही देशहरुको ओभरसिज राइट्स पनि बिक्रि भईसकेको छ ।