३५ तोला अवैध सुन प्रकरणमा पक्राउ परेका डीएसपी ठगबहादुर बर्खास्त

रुपन्देही । बुटवलमा व्यवसायीको ३५ तोला सुनसहित पक्राउ परेका इलाका प्रहरी कार्यालय बुटवलका तत्कालीन प्रहरी नायव उपरीक्षक (डीएसपी) ठगहादुर केसी बर्खास्त भएका छन् ।

प्रहरी प्रधान कार्यालयको सिफारिसमा उनलाई गृहमन्त्रालयले बर्खास्त गरेको हो।

हेडक्वाटरले गरेको आन्तरिक छानबिनका क्रममा गम्भीर गल्ती गरेको देखिएकाले उनलाई बर्खास्त गर्नुपर्ने भन्दै गृहलाई सिफारिस गरेको थियो। केसीलाई प्रहरी प्रधान कार्यालयको सिफारिसमा गृह मन्त्रालयका सचिव दिनेश भट्टराईले सोमबार बर्खास्त गरेका हुन् ।

प्रहरी प्रधान कार्यालयको कानुन शाखाले डीएसपी केसीलाई बर्खास्त गर्नुपर्ने राय दिएपछि सोहीअनुसार बर्खास्तका लागि भन्दै गृह मन्त्रालयलाई प्रहरी हेडक्वाटरले पत्राचार गरेको थियो। केसीलाई भविष्यमा सरकारी सेवामा अयोग्य नहुनेगरी बर्खास्त गरिएको नेपाल प्रहरीका केन्द्रीय प्रवक्ता तथा प्रहरी नायव महानिरीक्षक (डीआईजी) कुवेर कडायतले जनाएका छन् । उनी प्रहरीमा अब छिर्न नपाएपनि अन्य सरकारी सेवामा भने काम गर्न पाउनेछन् ।