यौनसँग जोडिएको डोमेन भन्दै इन्डोनेसियाले प्रतिबन्ध लगायो ट्वीटर वेबसाइट

काठमाडौं । सामाजिक सञ्जाल प्लेटफर्म ट्वीटरको वेबसाइटलाई परिवर्तन गरेर ‘एक्स डटकम’ बनाएसँगै इन्डोनेसियाले प्रतिबन्ध लगाएको छ ।

यौनजन्य नाममा वेबसाइट ठेगाना आएको भन्दै इन्डोनेसियाले उक्त डोमेन प्रतिबन्ध लगाएको हो । कानूनीरूपमा पोर्न साइट प्रतिबन्ध लगाउन लागू गरिएको कानुन नै उक्त वेबसाइट प्रतिबन्धमा आकर्षित गरिएको छ ।

इन्डोनेसियाका सञ्चार तथा सूचना प्रविधि मन्त्रालयका प्रवक्ता उसमान कानसोङले ट्वीटरको नयाँ डोमेनले पहिले पोर्न साइटको रूपमा रहेका वेबसाइटको झल्को दिएको भन्दै यसको प्रतिबन्ध गरेको मिडियालाई बताएको अन्तर्राष्ट्रिय सञ्चारमाध्यमले उल्लेख गरेका छन् ।

केही दिनअघि मात्र ट्वीटरका सीईओ एलन मस्कले ट्वीटरलाई एक्स बनाउने निर्णय लिएका थिए । एक्स मस्कको प्रिय नाम हो । अन्तरिक्ष कम्पनीको नाम पनि उनले स्पेस एक्स राखेका छन् । एलनले आफ्नो व्यवसायिक संस्थाको नाम पनि एक्स कर्पोरेसन राखेका छन् ।