योगेशको जिकिर- बहुमत ल्याउने ल्याकत एमालेसँग मात्र

काठमाडौं । नेकपा एमालेका सचिव योगेश भट्टराईले अहिलेको निर्वाचन प्रणालीले एउटा मात्र दलले बहुमत ल्याउन कठिन देखिएपनि एमालेले त्यो ल्याकत राख्ने बताएका छन् ।

संगठनलाई व्यवस्थितरूपमा परिचालन गर्ने, अन्तरविरोध हटाउँदै लाने, अवसरको समान वितरण र केही भिजन लिएर प्रक्रियाबद्ध जान सके एमालेका लागि बहुमत सम्भव रहेको उनको जिकिर छ । भट्टराईले बिहीबार काठमाडौंमा केही सञ्चारकर्मीसँग मिसन ग्रासरूट अन्तर्गत कर्णालीको डेढ महिने दौडाहा र मधेश इन्चार्ज पाएपछिको पहिलो चरणको अभियानको अनुभव सुनाएका छन् ।

उनले भने, ‘एमालेप्रतिको जनलहर उस्तै छ । अझ बढेको छ । यसअघि दुईतिहाइनजिकको अवसरलाई हामीले सदुपयोग गर्न सकेनौं । अहिलेको निर्वाचन प्रणालीले निश्चित दललाई बहुमत दिने विषय जटिल भएपनि मेहनत गर्दा एमालेले मात्र त्यो सक्छ । २०८४ को मिसनमा सम्पूर्ण पार्टी पंक्ति योजनाबद्ध ढंगले लाग्न जरुरी छ ।’

बहुमतका लागि मधेशसँग धेरै सीट भएकाले त्यो महत्वपूर्ण हुने भएकाले पार्टीले त्यहाँको आर्थिक, सामाजिक, पूर्वाधारलगायतको विकास र जनतासँग प्रत्यक्ष जोडिएर विशेष गतिविधि चलाउनुपर्नेमा नेता भट्टराईको जोड छ ।

उनले केहीले सेन्टिमेन्ट बटुल्न निर्वाचन प्रणाली फेर्ने, संघीयता खारेजी, धर्मनिरपेक्षताविरुद्ध कुरा गरेपनि त्यो अहिले असम्भव रहेको बताए ।

गएको चुनावमा समानुपातिकमा एमाले दोस्रो भएपनि सीट संख्याको हिसाबले पहिलो भएको उनको भनाइ छ । मंसिर ४ मा एमालेले प्रतिनिधिसभामा ९ र प्रदेशसभामा २४ सीट जितेको छ । मधेशका जिल्लाजिल्लामा गुटबन्दी र चर्को अन्तरविरोध देखेको भन्दै त्यसको समाधानलाई आफूले पहिलो प्राथमिकतामा राखेको भट्टराईले बताए । प्रभु साहले गडबडी गर्ने चुनावी परिमाणमा केही चोट पुगेको उनको भनाइ थियो ।

आपसमा लड्नेहरूलाई नै एकैठाउँमा राखेर सहमति गराएर लैजाने उनको योजना छ । मधेशविरोधी पार्टी भनेर चित्रण गरिएको एमालेमा पछिल्लो समय जनताको आकर्षण बढेको पाइएको उनको भनाइ छ ।

सचिव भट्टराईले साढे ३ लाख समानुपातिक भोटलाई ८४ मा ७ लाख पुर्‍याउने लक्ष्यका साथ रणनीति सुरू गरिएको बताएका छन् ।

‘८० हजारको हाराहारी संगठित सदस्यमध्ये ५० हजार प्लस नवीकरण भइसकेको छ । २९ हजार नयाँ आवेदन परेको छ । एमालेमा प्रवेशको ताती छ । उनीहरूलाई व्यवस्थित गर्न र उचित जिम्मेवारी दिन सकिइरहेको छैन । संगठित सदस्यलाई बढाएर १ लाख ७५ हजार बनाउने योजना लिएका छौं’, भट्टराईले भने ।