चलचित्र ‘जुलेबी’को ट्रेलर सार्वजनिक, भदौ १ गतेबाट प्रदर्शनमा आउने

काठमाडौं। आगामी भदौ १ गतेबाट प्रदर्शनमा आउने चलचित्र ‘जुलेबी’को ट्रेलर सार्वजनिक गरिएको छ । सार्वजनिक २ मिनेट लामो ट्रेलरले चलचित्र यौन मनोविज्ञानमा केन्द्रित रहेको संकेत गर्दछ।

‘जुलेबी’ लेखक तथा निर्देशकको आफ्नै जीवनको भोगाइबाट उत्पन्न भएको कथा हो। ‘चलचित्रका पात्रहरुलाई रत्नपार्कले जोड्छ र चलचित्रको कथा सात जना पात्रहरुको सम्बन्धको वरिपरि घुमेको छ,’चलचित्रका लेखक तथा निर्देशक गणेश देव पाण्डे बताउँछन्।

चार जना महिला पात्रको कथा रहेको चलचित्रको निर्माता पनि महिला नै हुन्। महिलाले भोग्ने सम्बन्धको कथा नै चलचित्रले बोल्ने निर्माता आभा शर्मा नेपालले बताइन्।

एन्थोलोजी जनरामा आधारित चलचित्रमा नवीन भट्ट कार्यकारी निर्माताका रुपमा छन्। फोर क्युब इन्टरटेन्मेन्टको ब्यानरमा निर्माण भएको चलचित्रमा सुरक्षा पन्त, निशा अधिकारी, उषा रजक, मोनिका थापा, सुशील सिटौला, पुष्कर कार्की, तुफान थापा, समीरमणी दिक्षित आदि लगायतका कलाकारहरुको अभिनय छ । चलचित्रको लेखक निर्देशक पाण्डे स्वयं हुन।

चलचित्रमा विवेक खड्काको छायांकन, जाटवेद बनर्जीको संगीत, अन्जय खड्काको सम्पादन र उत्तम न्यौपानेको साउण्ड डिजाइन रहेको छ। डिसीएन र रिच इन्टरटेन्टमेन्टले वितरणको जिम्मा लिएको चलचित्रको डिजिटल राइट्स डि।ए।आर मुभिजले खरिद गरेको छ।