भोजपुरमा युवा संघको ‘एक युवा पाँच बिरुवा अभियान’

भोजपुर । राष्ट्रिय युवा संघ भोजपुर नगरकमिटी भोजपुरले ‘एक युवा पाँच बिरुवा’ अभियानको शुरुवात गरेको छ ।

भोजपुर नगरपालिका १२ स्थित तीनधारा र सिढी सरसफाइसँगै वृक्षारोपण गरेको हो ।

‘एक युवा पाँच बिरुवा’ अभियान अन्तरगत युवा संघको आयोजनामा वृक्षारोपण गरिएको नगर अध्यक्ष दिपेन दर्नालले बताए । तीनधारा क्षेत्रका साथै सिढी सरसफाइ गरिएको हो ।

युवाहरूलाई सामाजिक काममा जोड्नुका साथै श्रम संस्कृति आबद्ध गर्नका लागि अभियान थालिएको नगर अध्यक्ष दर्नालले बताए ।

कार्यक्रम हरेक शनिवार गरिने संघले जनाएको छ । कार्यक्रममा नेकपा एमालेका नेता एवं प्रदेश सभा सदस्य सृजना राई एमाले भोजपुर अध्यक्ष शरणकुमार राई लगायतको सहभागिता रहेको थियो ।