भदौ १३ देखि प्रज्ञा भवनमा ‘८० सालको गाईजात्रा’, मनोज गजुरेलदेखि सुबोध गौतमसम्मले हँसाउने

काठमाडौं । कोरोना महामारीयताको पहिलो गाईजात्रा प्रहसन यस वर्ष भदौ १३ गतेदेखि आयोजना हुने भएको छ । ‘८० सालको गाईजात्रा’ नाम दिइएको यो कार्यक्रम भाद्र १८ गतेसम्म प्रज्ञा भवनमा चल्नेछ ।

ब्राण्डवर्थ प्रालिले यसपालिको गाईजात्रा कार्यक्रमको आयोजना गरेको हो । कार्यक्रममा मनोज गजुरेल, शैलेन्द्र सिंखडा, टीका भण्डारी, सुबोध गौतम, मेक्सम गौडेल, सुन्दर खनाल, सीता न्यौपाने, राधिका कँडेल, प्रभात लामा, रुविना अधिकारी, चक्र दवाडीलगायतका कलाकारहरुले दर्शकहरुलाई हँसाउनेछन् ।

जेसीस, लायन्स क्लवलगायतका संस्थाहरुसँगको सहकार्यमा ब्राण्डवर्थ प्रालिले उपत्यका बाहिर पनि ‘८० सालको गाईजात्रा’ आयोजना गर्दैछ । विराटनगर, बर्दिबास, चन्द्रनिगाहपुर, सैनामैना, दाङमा कार्यक्रम हुने पक्का भइसकेको छ । साथै अन्य शहरमा पनि ‘८० सालको गाईजात्रा’ आयोजना हुनेछ ।

कोरोना महामारीका दुईवटा वर्षमा पनि डिजिटल गाईजात्रा गरेर दर्शकलाई मनोरञ्जन गराइएको थियो । यस पटक पनि रङ्गमञ्च सँगसँगै टेलिभिजनमा पनि ‘डिजिटल गाईजात्रा’ प्रशारण गर्नेछ । सात इपिसोडमा प्रशारण हुने ‘डिजिटल गाईजात्रा’ को पोस्ट प्रोडक्सन सकेर कलाकारहरु रंगमञ्चमा हुने ‘८० सालको गाईजात्रा’ को रिहर्सलमा व्यस्त छन् ।