‘जुलेबी’को ‘आज मन’ बोलको गीत सार्वजनिक

काठमाडौं । यही भदौ १ गतेबाट प्रदर्शनमा आउने चलचित्र ‘जुलेबी’ को गीत सार्वजनिक गरिएको छ । राजधानीमा एक कार्यक्रमबीच चलचित्रको ‘आज मन’ बोलको गीत सार्वजनिक गरिएको हो । सार्वजनिक गीतमा केतन क्षेत्रीको स्वर रहेको छ । शब्द तथा संगीत भने कोसिस क्षेत्री र केतन क्षेत्रीले भरेका छन् ।

गीत सार्वजनिक कार्यक्रममा निर्देशक गणेशदेव पाण्डे, निर्माता आभा नेपाल, कार्यकारी निर्माता नवीन भट्ट र कलाकारसहित चलचित्रको सम्पूर्ण टीमको उपस्थिति थियो ।

‘जुलेबी’ लेखक तथा निर्देशकको आफ्नै जीवनको भोगाइबाट उत्पन्न भएको कथा हो । लेखक तथा निर्देशक पाण्डेले भने, ‘चलचित्रका पात्रहरुलाई रत्नपार्कले जोड्छ । चलचित्रको कथा सात जना पात्रको सम्बन्धको वरिपरि घुमेको छ ।’

अभिनेत्री सुरक्षा पन्तले पनि चलचित्रको कथा रत्नपार्कको वरिपरि घुमेको र फरक कथामा निर्देशक पाण्डेसँग काम गर्दा मज्जा आएको अनुभव सुनाइन् ।

‘यस्तो कथामा धेरै चलचित्र बन्दैनन् । हाम्रो समाजले हेर्ने दृष्टिकोण फरक भए तापनि उहाँहरु (यौनकर्मी) सुन्दर व्यक्तिहरु हुनुहुन्छ । उहाँहरुको आफ्नै कथाव्यथा छन्’, उनले भनिन् ।

एन्थोलोजी जनरामा बनेको चलचित्र आभा शर्मा नेपालले निर्माण गरेकी हुन् । फोर क्युब इन्टरटेन्मेन्टको ब्यानरमा निर्माण भएको चलचित्रमा सुरक्षा पन्त, निशा अधिकारी, उषा रजक, मोनिका थापा, सुशील सिटौला, पुष्कर कार्की, तुफान थापा, समीरमणि दिक्षीतलगायतको अभिनय छ ।

चलचित्रमा विवेक खड्काको छायांकन, जाटवेद बनर्जीको संगीत, अन्जय खड्काको सम्पादन र उत्तम न्यौपानेको साउण्ड डिजाइन रहेको छ । डीसीएन र रिच इन्टरटेन्टमेन्टले वितरणको जिम्मा लिएको चलचित्रको डिजिटल अधिकार डीएआर मुभिजले खरिद गरेको छ ।