पारसका लागि महत्वपूर्ण मानिएको काठमाडौं जिल्ला क्रिकेट संघको चुनाव आज

काठमाडौं। काठमाडौं जिल्ला क्रिकेट संघको चुनाव आज हुँदैछ। अपरान्ह ४ बजे कालिकास्थानमा हुने चुनाव नेपाली राष्ट्रिय क्रिकेट टोलीका पूर्वकप्तान पारस खड्काका लागि महत्वपूर्ण मानिएको छ। खड्का बागमती प्रदेशमा उठ्ने तयारी गरिरहेका छन्।

काठमाडौं जिल्ला क्रिकेट संघका निवर्तमान अध्यक्ष अमिरवीर पाण्डे र दिवाकर घले नेतृत्वका लागि प्रतिस्पर्धा गर्ने तयारी छ। ३६ जना सदस्यले १५ सदस्यीय जिल्ला समिति चयन गर्नेछन्।

काठमाडौं जिल्लाले केन्द्रीय चुनावका लागि एक जना र प्रदेश चुनावका लागि ४ जना प्रतिनिधि पठाउने छ। जिल्ला समितिले साधारण सदस्यमध्येबाट पनि प्रतिनिधि पठाउन सक्ने कानूनी व्यवस्था रहेको छ।

क्यानको केन्द्रीय निर्वाचन आगामी असोज ५ र ६ गते हुँदैछ। त्यसअघि साउन मसान्तसम्म जिल्ला र भदौ २० गतेसम्म प्रदेशको चुनाव सम्पन्न गरिसक्नुपर्ने छ। प्रदेशले १३ सदस्यीय समिति चयन गर्नेछ भने आफ्ना सदस्य जिल्लाको आधा संख्यामा प्रतिनिधि केन्द्रीय निर्वाचनका लागि पठाउने छ।

क्यानको केन्द्रीय निर्वाचनमा वर्तमान कार्य समितिका १५, ४५ जिल्ला सदस्यका एकएक प्रतिनिधि र बाँकी प्रदेश प्रतिनिधिले मतदान गर्नेछन्। कुल ८८ मतदाता रहे पनि दुई जना केन्द्रीय पदाधिकारीले राजीनामा दिएका कारण आसन्न केन्द्रीय निर्वाचनमा ८६ जनाले मतदान गर्नेछन्। क्यानमा १७ सदस्यीय केन्द्रीय समिति हुने व्यवस्था छ।

हालसम्म ४२ जिल्ला सदस्यको निर्वाचन भइसकेको छ। काठमाडौं, पर्सा र कैलालीको मात्र चुनाव हुन बाँकी छ। स्रोतका अनुसार बागमती प्रदेशअन्तर्गतका ६ जिल्लामा पारस सक्रियतासाथ लागि परेका छन्। त्यसमध्ये भक्तपुर, ललितपुर र मकवानपुरमा उनले समर्थन गरेका उम्मेदवारले जितेको बुझिएको छ ।