ओली-रावलको ‘आइसब्रेक’, पार्टी कार्यालयमा छलफल

काठमाडाैं । नेकपा एमालेका अध्यक्ष केपी शर्मा ओली र नेता भीम रावलबीच छलफल भएको छ ।

पार्टी कार्यालय च्यासलमा आज दुई नेताबीच छलफल भएकाे हाे । १० औँ महाधिवेशनमा अध्यक्ष पदमा पराजित भएका रावल त्यसपछि एमालेमा सक्रिय थिएनन् । उनीहरूबीचको छलफललाई अर्थपूर्ण ढंगले हेरिएको छ ।

एमाले उपाध्यक्ष विष्णु पौडेल सहभागी कार्यक्रममा अछाममा नाराबाजी भएपछि रावलसँग वार्ता गर्न पौडेलको संयोजकत्वमा कार्यदल बनाइएको थियो ।

उक्त कार्यदलमा पार्टी सचिव लेखराज भट्ट र स्थायी कमिटी सदस्य कर्ण थापा थिए । रावलले यस अघि उक्त समितिसँग केही समय अघि छलफल गरेका थिए ।

अध्यक्ष ओली रावललाई एक पल्ट भेट गराउने गरी कार्यदलले तयारी गरेको थियो । त्यसको केही समयपछि आज दुवैबीच भेटवार्ता भएको हो ।