हिन्दूत्वको भर्त्सनामा टिकेको उदार प्रगतिशील ‘फण्डित’ जमात र शास्वत धाममा शास्त्रीको प्रवचन

वाचन शिरोमणी स्वर्गीय नारायणप्रसाद पोखरेलले दिएका सयौं प्रवचनहरूमध्येका दुईवटा भिडिओ क्लिप अहिले सामाजिक सञ्जालमा चर्चामा छन् । जुन क्लिपमा पण्डित पोखरेलले बोक्सी हुँदैन र हिन्दू धर्ममा महिला, पुरुष र तेस्रो लिंगी (उनको भाषामा नपुंसक) बाहेक अरु जात हुँदैन भनेका छन् ।

उनले बोक्सी र जातपात मान्छेहरूले एक अर्कोलाई थिचोमिचो र शासन गर्नका लागि पछि बनाएको भन्दै हिन्दूत्वको बदनाम नगर्न भनेका छन् । दुर्भाग्य जातपात र बोक्सीप्रथाजस्ता सामन्ती व्यवस्थाको अन्त गर्न हिँडेका माओवादी जनयुद्धकारीहरूले नै पण्डित पोखरेलको हत्या गरे ।

पोखरेलका पुराना यी दुई भिडिओ क्लिप भाइरल भइरहेका बेला नेपालका केही मिडियामा भारतीय धर्मगुरु धीरेन्द्रकृष्ण शास्त्रीका स्त्रीद्वेषी, जातीद्वेषी भिडिओ क्लिपहरूसहित उनी हिन्दूत्वको नाममा विष फैलाउन नेपाल आउन लागेको भनेर उनलाई रोक्नुपर्ने लेख, समाचारहरू आइरहेका छन् ।

धरानमा हिन्दू मन्दिर परिसरमा चर्च बनाएपछि सुरू भएको विवादले गोरु काटेर सामूहिक भोजको चरणमा प्रवेश गरिरहेका बेला नेपालको ‘उदार, प्रगतिशील’ अभियन्ताको तप्का शास्त्रीलाई रोक्न र हिन्दूत्वलाई ठोक्न संगठित मिसनमा उत्रिएको देख्दा केही न केही हुँदैछ भन्ने आशंका उब्जिनु स्वाभाविक हो ।

नेपालमा उदार प्रगतिशील अभियन्ता बन्न, सामाजिक न्यायसहितको फरक चेतको प्रमाणपत्र पाउन अरु केही गरिरहनु पर्दैन, मात्र हिन्दूत्वलाई भर्त्सना गरे पुग्छ । त्यति गर्दा पनि नपुगे पृथ्वीनारायण शाह र भानुभक्त आचार्यलाई निन्दा गर्नुपर्छ । त्यतिले समेत नपुगे राजा महेन्द्रदेखि कविवर माधव घिमिरेसम्मको भर्त्सना गरेपछि त सामाजिक न्यायको अभियन्तावाला ‘साठीपिकेट’ घरमै आइपुग्छ ।

जहाँसम्म हिन्दूराज्य वा हिन्दूत्व रक्षाको कुरा छ त्यो त एउटा धार्मिक गुरुको मन्त्र नै हो । पटकपटक नेपालका सत्ता सन्चालकहरूकै निम्तोमा आउने स्वामी रामदेवले खुलेरै नेपाल हिन्दूराज्य हुनुपर्छ भनिरहेकै छन् । पछिल्लोपटक खप्तडमा आएर पनि उनले नेपाल हिन्दूराज्य हुनुपर्ने बताए । के नेपालमा धार्मिक हिंसा भयो ?

केही दिनयता भारतको एउटा धार्मिक प्रतिष्ठानका धर्मगुरु नेपालको एउटा धार्मिक प्रतिष्ठानमा कथा प्रवचन गर्न आउन लागेको विषयले अब नेपालमा धार्मिक दंगा मच्चाउन लागियो भन्ने तहमा बहस थालिएको छ । के धीरेन्द्रकृष्ण शास्त्री नेपालमा धार्मिक हिंसा मच्चाउन र नेपाललाई हिन्दू राज्यमा पुन:स्थापित गर्न आउन लागेका हुन् ? मूलधारकै मिडियामा छेडिएको बहसले यो प्रश्न सिर्जना गरेको छ ।

स्वर्गीय पण्डित नारायण पोखरेलको स्मरण यसकारण गरिएको हो कि, उनका प्रवचनमा धार्मिक हिंसा देखेर त्रसित हुनेहरूकै उत्तराधिकारीहरू आज एउटा धार्मिक अनुष्ठानमा हुने प्रवचनबाट नेपालमा धार्मिक दंगा मच्चिने भनेर आतंक फैलाउन खोजिरहेका छन् ।

पण्डित नारायण पोखरेलले जातभात, बोक्सी डाइनीजस्ता कुप्रथा हिन्दू धर्ममा बर्जित छन् भनेका थिए । उनले हिंसाको वकालत गरेनन् तर हिंस्रकले उनको शान्ति प्रवचनबाट डराएर हत्या गरेका थिए । यस्तै ‘फण्डित’ हरूको जमात आज नेपालमा कुनै धार्मिक ठाउँमा प्रवचन हुन लाग्दा धार्मिक हिंसाको आतंक मच्चाएर हिन्दूत्वमाथि प्रहार गर्दैछ ।

शास्त्री कसका पाहुना हुन् ?

सबैभन्दा पहिले शास्त्रीलाई किन र कसले बोलायो ? यसबारे जानकारी आवश्यक छ । उनी नेपाल सरकार वा कुनै सरकारी निकाय पशुपति विकास कोष वा अन्य कुनै सरकारी अनुदानप्राप्त प्रतिष्ठानहरूको निम्तामा आउन लागेका हुन् ? वा कुनै स्थानीय सरकारको निम्तोमा ?

भारतको मध्य प्रदेशस्थित बागेश्वर धामका संस्थापक तथा धार्मिक प्रवचक धीरेन्द्रकृष्ण शास्त्री नेपालको गण्डकी प्रदेशस्थित नवलपरासीको दुम्कौलीमा रहेको शाश्वत धाममा ‘हनुमान कथा वाचन’ का लागि आउँदैछन् । प्राप्त जानकारी अनुसार उनी चौधरी गुप्रका प्रबन्ध निर्देशक बरुण चौधरीको निमन्त्रणमा आउन लागेका हुन् ।

नेपालको अग्रणी औद्योगिक तथा व्यापारिक घराना चौधरी गुप्रले व्यवस्थापन गरेको शाश्वत धाम सोही उद्योग ग्रामभित्र रहेको छ । भदौ १ गते नेपाल आउने धर्मगुरु धीरेन्द्रकृष्ण शास्त्री पशुपतिनाथको दर्शनपछि नवलपुर जानेछन् ।

शास्त्रीसँगै उनको कथा वाचन समूहका ५०/६० जना पनि नेपाल आउनेछन् र शाश्वत धाममा पण्डाल लगाएर हनुमान कथा वाचन हुनेछ । व्यवस्थापनका अनुसार एक दिनमा करीव ११ हजार जनाले कथा श्रवण गर्न मिल्नेछ भने प्रत्यक्ष उपस्थित हुन नसक्नेका लागि सामाजिक सञ्जाल र डिजिटल डिस्प्लेमार्फत कथा सुन्ने व्यवस्था मिलाइएको छ ।

भदौ २,३ र ४ गते हुने कथा वाचन श्रवण गर्नका लागि इच्छुकहरू जान सक्छन् तर कसैलाई जानका लागि कर छैन । यहाँ हिन्दू वा गैरहिन्दू भनेर नछुट्याइएको र सबै धर्म, संस्कृतिका मान्छेहरूलाई स्वागत गरिएको आयोजकले प्रष्ट पारेका छन् । र, यहाँ नेपालको संविधान, कानून र नीति नियमभित्र रहेर कथा वाचन तथा श्रवणका कार्यक्रम हुनेछन् ।

को हुन् शास्त्री ?

भारत विश्वकै सबैभन्दा ठूलो हिन्दू आवाद भएको देश हो । भारतमा बेला बेलामा धेरै धर्मगुरुहरू चर्चामा आउँछन् । कोही आफ्नो मान प्रतिष्ठा कायम राखेरै यो लोकबाट विदा हुन्छन् भने कोही जीवनकालमा अनेक काण्डमा परेर जेल पुगेका धेरै उदाहरण छन् । पछिल्ला उदाहरण आशाराम बापु हुन् ।

साइबाबादेखि जगतगुरुसम्म, रामदेवदेखि स्वामी शिवानन्दसम्म धेरै विश्वचर्चित गुरुहरूले आफ्ना प्रवचन वा योगशिक्षबाट नाम कमाए । बदनामी कमाउनेहरू पनि थिए तर उनीहरू आफ्नै कर्मले हराए ।

पछिल्लो समय नेपाल आउन लागेका धीरेन्द्रकृष्ण शास्त्री जसलाई बागेश्वर धाम महाराजसमेत भनिन्छ । उनी बागेश्वर धामका पिठाधीश हुन् र उनी विभिन्न प्रवचनका कारण चर्चा र विवादमा समेत आउने गरेका छन् ।

खासमा शास्त्रीको आगमनलाई देखाएर नेपालको सनातन धर्म संस्कृतिविरुद्ध लामो समयदेखि योजनाबद्धरुपमा तयार पारिएको पश्चिमा ‘फण्डित’ तप्का हिन्दूत्वमाथि हमला गर्ने मौका यहि हो भनेर ‘अतिवादको अस्त्र’ देखाएर तर्साउँदैछ ।

२७ वर्षीय शास्त्रीका पिता पनि बागेश्वर धाममै काम गर्थे । पछिल्लो समय शास्त्री चर्चामा आउनुको अर्को कारण चाहिँ भारतलाई हिन्दूराज्य बनाउने उनको बहुचर्चित घोषणा हो । यसैले नेपालमा उनको आगमनलाई लिएर हिन्दूराज्यका विरोधीहरूले विवादस्पद बनाउन खोजेका छन् ।

शास्त्रीले गलत काम गरेका छन् वा उनी धार्मिक हिंसा मच्चाउन खोज्छन् भने त्यो भारतको संविधान र कानून आकर्षित हुने कुरा हो । उनी नेपालको एउटा निजी धार्मिक प्रतिष्ठानमा हनुमान प्रवचन दिन आउँदैछन् । यदि नेपालको संविधान र कानूनविपरितका गतिविधि गरे भने उनीमाथि कारबाही गर्न नेपाल स्वतन्त्र छ ।

प्रवचनबाट त्रसित धर्मनिरपेक्षवाद

भारतीय जनता पार्टीले हिन्दूत्वको वकालत गर्छ । अझ उत्तर प्रदेशका मुख्यमन्त्री योगी आदित्यनाथले हिन्दूराज्य भारत बनाउने भनिरहेका छन् । त्यसो भए धर्मनिरपेक्ष देश नेपालमा भाजपाका नेता र मन्त्रीहरूलाई आउन नदिने ? उनीहरूले धार्मिक हिंसा मच्चाउँछन् भन्ने ? प्रश्न यसरी पनि उठाउन सकिन्छ ।

शास्त्रीको राक्षसीकरण जसरी नेपाली मिडियामा गरिँदैछ उनी गलत भए भारत सरकारले प्रवचन दिएर हिँड्नको साटो जेलमा राख्थ्यो होला । बीजेपी सरकारकै पालामा धेरै धर्मगुरुहरू जेलमा पुगेका छन् । त्यसैले एउटा धर्मगुरुको प्रवचनबाट डराउने धर्मनिरपेक्षवाद कति कमजोर छ ? प्रश्न त यो कोणबाट पनि उठाउन सकिन्छ ।

शास्त्रीले नेपालको सार्वभौमसत्ता, अखण्डा र यहाँको संविधानविपरीत केही बोले भने त्यो क्षम्य हुँदैन र उनले आफ्नो सीमाको उल्लंघन गरे भने उनलाई निम्ता गर्ने चौधरी ग्रुपले त्यसको जिम्मा लिनुपर्छ । उनको प्रवचनको शीर्षक जे हो, त्यसमा उनले सीमित हुनुपर्छ ।

भारतको मध्य प्रदेशस्थित बागेश्वर धामका संस्थापक तथा धार्मिक प्रवचक धीरेन्द्रकृष्ण शास्त्री नेपालको गण्डकी प्रदेशस्थित नवलपरासीको दुम्कौलीमा रहेको शाश्वत धाममा ‘हनुमान कथा वाचन’ का लागि आउँदैछन् । प्राप्त जानकारी अनुसार उनी चौधरी गुप्रका प्रबन्ध निर्देशक बरुण चौधरीको निमन्त्रणमा आउन लागेका हुन् ।

जहाँसम्म हिन्दूराज्य वा हिन्दूत्व रक्षाको कुरा छ त्यो त एउटा धार्मिक गुरुको मन्त्र नै हो । पटकपटक नेपालका सत्ता सन्चालकहरूकै निम्तोमा आउने स्वामी रामदेवले खुलेरै नेपाल हिन्दूराज्य हुनुपर्छ भनिरहेकै छन् । पछिल्लोपटक खप्तडमा आएर पनि उनले नेपाल हिन्दूराज्य हुनुपर्ने बताए । के नेपालमा धार्मिक हिंसा भयो ?

खासमा शास्त्रीको आगमनलाई देखाएर नेपालको सनातन धर्म संस्कृतिविरुद्ध लामो समयदेखि योजनाबद्धरुपमा तयार पारिएको पश्चिमा ‘फण्डित’ तप्का हिन्दूत्वमाथि हमला गर्ने मौका यहि हो भनेर ‘अतिवादको अस्त्र’ देखाएर तर्साउँदैछ ।

यो त्यही जमात हो जसले बलात्कारी उत्पादन गर्ने कारखाना मठ मन्दिर र बलात्कारको विषवृक्ष हिन्दू धर्म हो भनेर ओपेड लेख्छ । नेपालको उदार हिन्दू मनमाथि इमोसनल ब्ल्याकमेल गर्दै सनातन संस्कृति तथा सभ्यता मास्ने मिसनरीको कलो खाएर हिन्दूत्वको गला घोट्छ ।

शास्त्रीको प्रवचनबाट उनीहरू डराउनुको कारण एउटै हो, कतै फण्डित्याइँको ड्युटी राम्ररी नगर्दा प्रोजेक्ट बन्द गरिदिन्छन् कि ? नत्र भने कथा सुन्न मन हुनेहरू शास्वत धाममा जान्छन्, मन नहुनेहरू जाँदैनन् । उसै पनि यस्ता पुराण, कथा वाचनहरू च्लिरहेकै हुन्छन्, कसले कहाँ दंगा मच्चाए हँ ?