बुटवलमा नेत्र पन्थीको लेफ्टराइट पुस्तकको समीक्षा

रुपन्देही । पाठक मञ्चले बुटवलमा पत्रकार नेत्र पन्थीको नयाँ पुस्तक ‘लेफ्ट–राइट : सत्ता र शक्तिको ’अ’राजनीति‘ पुस्तकमाथि समीक्षा गराएको छ ।

रुपन्देहीबाट पत्रकारिता सुरू गरी हाल काठमाडौं बस्ने पन्थीले केही समयअघि प्रकाशित गरेको पुस्तकको विषयमा लेखक, पाठकबीच सँगै बसेर समीक्षा गरिएको हो ।

कार्यक्रममा यस क्षेत्रका लेखक तथा साहित्यकारहरूले पुस्तकका बारेमा छलफल गर्दै पुस्तकमा समेटिएका महत्त्वपूर्ण विषय र अर्को प्रकाशनमा थप्नुपर्ने विषयमा छलफल गरिएको थियो ।

समीक्षक तथा सहभागी पाठकले पुस्तकले नेपालको राजनीतिमा सत्ताका लागि भएका खेलहरूको अनेक अन्तर कथाहरू तथ्यगत रूपमा समेटिएको भन्दै पुस्तकका विभिन्न पक्षमाथि विचार विमर्श गरेका थिए ।

उनीहरूले मुख्य दलका शीर्ष नेताहरू सत्ता र शक्ति प्राप्तिका लागि राजनीतिक मूल्य–मान्यता, इमानदारिता भन्दा बाहिर कसरी चलखेल गर्दै कस्ता कस्ता कदम चाल्छन् भन्ने विषय वस्तु समेटिएको एउटा महत्त्वपूर्ण दस्ताबेजका रूपमा पुस्तक रहेको बताए ।

सहभागीहरूले पुस्तकका विभिन्न पक्षमाथि टीकाटिप्पणी गर्दै विभिन्न जिज्ञासा तथा सुझावहरू समेत राखेका थिए । पुस्तक राजनीतिमा रुचि राख्नेका लागि उपयोगी दस्ताबेजका रूपमा रहेको भन्दै राजनीतिमा हुने खेलहरू पुस्तकमा पढ्न पाइने उनीहरूको भनाई थियो बताए ।

पुस्तकमाथि टिप्पणी गर्दै लेखक तथा पत्रकार डीआर घिमिरेले पुस्तकको केन्द्र भागमा पुष्पकमल दाहाल ‘प्रचण्ड’लाई राखेर सत्ता र शक्तिका लागि भएका खेलहरू गहन र तथ्यगत रूपमा पुस्तकमा समेटिएको बताए ।

त्यस्तै लेखक तथा साहित्यकारहरू रामचन्द्र श्रेष्ठ, शङ्कर गाह, मनिकर कार्की, माधवकुमार पौडेल, टोप अस्लामी, विमल गिरीलगायतले पुस्तकमा समेटिएका विभिन्न पक्षमाथि धारणा राखेका थिए । समीक्षा कार्यक्रमको संयोजन स्तम्भकार समाज रुपन्देहीका अध्यक्ष तथा पाठक मञ्चका सदस्य माधव कुमार पौडेलले गरेका थिए ।

कार्यक्रममा पुस्तकका लेखक पत्रकार नेत्र पन्थीले संविधान जारी पछि राजनीतिक नेताहरू जनताको चाहना अनुरूप देश विकासमा केन्द्रित हुन्छन् भन्ने जनअपेक्षा भए पनि सो अनुरूप नभएको तथ्यहरू पुस्तकमा समेटिएको बताए । पुस्तकमा पार्टीहरूका आन्तरिक झगडा, सत्ता मोह, सत्ता प्राप्तिपछिका परिवार मोहका तथ्यहरू पुस्तकमा समेटिएको उनले बताए ।

शीर्ष नेतृत्वबाट शक्ति र सत्ताका लागि हुने विभिन्न दाउपेच तथा धोकै-धोकाका तथ्यहरू समेटिएको पुस्तकको प्रकाशक साङ्ग्रिला मिडिया ग्रुप प्रालिले रहेको छ । पन्थीका यसअघि डिभोर्स प्रचण्ड बाबुरामको, माओवादीभित्र अन्तरसंघर्ष र युद्धमा प्रेम र यौनलगायतका पुस्तक प्रकाशित छन् ।

लेखक पन्थीले विभित्र क्षेत्रबाट पाएका सुझावलाई अर्को प्रकाशनमा जोड्ने प्रतिबद्धता जनाएका छन् ।