वयोवृद्ध चन्द्रदेव जोशीलाई बयानका लागि बोलायो, तर लिएन

काठमाडौं । ललिता निवास प्रकरणमा मुद्दा खेपिरहेका वयोवृद्ध नेता चन्द्रदेव जोशीले आफूलाई सीआइबीले बयानका लागि बोलाएर पनि नलिएको गुनासो गरेका छन् । उनले सामाजिक सञ्जालमा स्टाटस लेख्दै भ्रष्टाचारविरुद्धको हरेक प्रयासमा आफ्नो प्रतिवद्धता रहेको पनि जनाएका छन् ।

जोशीका अनुसार पहिलोपटक सीआइबी प्रमुख आफैंले बयानका लागि भनेर बोलाएका थिए । तर, ‘अहिले नआउनु’ भन्ने खबर आयो । आज फेरी बोलावट आएपछि उनी सवा १ बजे सीआईबी कार्यालय पुगे । तर, आज पनि बयान नलिइकन ‘फेरी बोलाउँला’ भनि पठाइएको जोशीको भनाइ छ । उनले आफू फरार नरहेको बताएका छन् ।

नेकपा संयुक्तका नेता जोशी २०६९ जेल ३ गते डा. बाबुराम भट्टराईको सरकारमा भूमिसुधार मन्त्री नियुक्त भएका थिए । सोही वर्ष असोज ३ गते उनले राजीनामा दिए । १२० दिन मन्त्री पदमा बस्दा गरेको एउटा निर्णयले उनलाई करोडौंको मुद्दा खेप्न वाध्य बनाएको छ ।

उनीविरुद्ध पक्राउ पूर्जिसमेत जारी भएको छ । ८५ वर्षिय जोशी सादगी नेताका रुपमा चिनिन्छन् ।