दिवङगत अभिनेता सारुक ताम्राकारलाई श्रद्धाञ्जली अर्पण गर्दै सार्वजनिक गरियो उनको अन्तिम गीत

काठमाडौं। दिवङगत अभिनेता सारुक ताम्राकारलाई श्रद्धाञ्जली अर्पण गर्न आज काठमाडौंमा एक कार्यक्रमको आयोजना गरिएको छ। अभिनेता ताम्राकारकी आमा रुकमणी ताम्राकार, नेपाल चलचित्र कलाकार संघको अध्यक्ष मोहन निरौला, अभिनेत्री सृष्टी श्रेष्ठ, अभिनेत्री मेलिना जोशी, अभिनेता मनिष श्रेष्ठ, निर्माता सरोज न्यौपाने र रोहित अधिकारी, निर्देशक सुदर्शन थापा, आदी लगायतका उपस्थितमा आयोजना भएको कार्यक्रममा सारुकको अन्तिम चलचित्र ‘ह्यासट्याग माया’ को केही दृश्य समेटी तयार परिएको म्युजिक भिडियोसमेत सार्वजनिक गरिएको छ।

चलचित्र ‘ह्यासट्याग माया’ सार्वजनिक गर्नु सारुकको अन्तिम इच्छा भएता पनि सो सम्भव नभएका कारण म्युजिक भिडियोको रुपमा सार्वजनिक गरिएको निर्माण कम्पनि ‘रे भेञ्चर्स’का अध्यक्ष तथा चलचित्र निर्देशक राजिव गुरुङले कार्यक्रममा जानकारी दिए ।

‘हामीले चलचित्र पुरा गर्न सकेनौँ। तर, सारुकको कामलाई समेटेर उसलाई मन परेको गीतमा ती दृश्यलाई राखेर म्युजिक भिडियो तयार गरेका छौँ। हाम्रो तर्फबाट सारुकलाई यो श्रद्धाञ्जली हो,’निर्देशक गुरुङ सुनाउछन्, ‘सारुक नरहेता पनि उसको काम हामी माँझ रहिरहने छ।’

बर्दियामा खिचिएको सार्वजनिक गीतमा अभिनेता ताम्राकारसँगै निकिता आचार्य, महेश मगर र सागर परियारले अभिनय गरेका छन्।

आफ्नो छोराले निकै मेहेनतका साथ गरेको कामलाई म्युजिक भिडियोकै माध्यमबाट सार्वजनिक गरिदिएकोमा सारुककी आमा रुकमणीले धन्यवाद व्यक्त गरिन्। उनले भनिन, ‘सारुकले यो चलचित्रको लागि तीन वर्षदेखि समय दिएको थियो। यसलाई ठूलो पर्दामा हेर्न नपाए पनि यहाँ हेर्न पाउँदा खुशी लाग्यो।’

सारुकका बुबा सानु ताम्राकार भने कार्यक्रममा अनुपस्थित थिए। छोराको मृत्यु–वियोगकै कारण पति सानु ताम्राकार अस्पताल भर्ना हुनुपरेकाले कार्यक्रममा उपस्थित नभएको सारुककी आमा रुकमणिले जानकारी गराइन्। उनले सारुकलाई लिएर सामाजिक सञ्जाल र अन्य विभिन्न माध्यममाअड्कलबाजी भइरहेकाले अनुसन्धानमा खटिएका प्रहरीलाई छिटै सत्यतथ्य सार्वजनिक गरिदिन समेत आग्रह गरिन् ।

कलाकार संघका अध्यक्ष मोहन निरौलाले पनि कार्यक्रममा बोल्दै सारुकले न्याय पाउनुपर्ने अभिव्यक्ति दिए। उनले भने, ‘म यो परिवारसँग जोडिएको चार दशक भईसक्यो । उहाँहरू सरुकलाई गुमाउँदा जुन पिडामा हुनुहुन्छ, त्यसलाई म शब्दमा व्यक्त गर्न सक्दिन। हामी पनि कलाकारसँग जोडिएको विषयलाई अनुसन्धान गरिरहनु भएका प्रहरीलाई छिटै टुंग्याउन र सत्य तथ्य बाहिर ल्याइदिन आग्रह गर्दछौँ।’

सारुकसँगै अभिनय सिकेकी अभिनेत्री सृष्टी श्रेष्ठ भने पुराना सम्झनालाई स्मरण गर्दै कार्यक्रममै भावुक भइन्। ‘सारुकसँग जोडिएका सम्झना आइरहेका छन्। हाम्रो समूहमा कसैलाई गाह्रो पर्दा सम्झाउने मान्छे, यसरी हामीसँग बिदा भयो भन्ने कुरा अझै पनि स्वीकार्न सकिरहेकी छैन। हाम्रो साथीले के–कति कारणले संसार छाड्यो भन्ने जान्न पाउनुपर्छ भन्ने हाम्रो माग हो। र, हामी अनुसन्धान गरिरहनुभएकासँग आशावादी छौँ,’अभिनेत्री श्रेष्ठले सुनाइन्।

चलचित्र ‘रानी’ बाट अभिनेताका रूपमा उदाएका ताम्राकारले ‘मेरी मामू’, ‘इन्टु मिन्टु लन्डनमा’लगायतका चलचित्रमा अभिनय गरेका छन्। अभिनेता ताम्राकारले गत असार २१ गते आफ्नै रातोपुलस्थित निवासमा आत्महत्या गरेका थिए ।