सरकारी बजेट खर्चेर प्रधानमन्त्रीलाई प्राधिकरणको काउन्टर, टेरामक्सको लबिङ गर्न गोप्य गोष्ठी (भिडिओ)

काठमाडौं । खुफिया एजेन्सीको काम गर्ने र व्यक्तिगत गोपनीयता रेकर्ड हुने भनी आलोच्य भएपछि प्रधानमन्त्रीले नै रोकेको टेरामक्स प्रविधि जडान गर्न नेपाल दूरसञ्चार प्राधिकरणले अझै आशक्ति देखाएको छ ।

नेपाल टेलिकमले ग्राहकको गोपनीयताको विषयलाई लिएर अदालतको आदेशसमेत देखाउँदै टेरामक्स प्रणाली जडान गर्न नसकिने भनेको र प्रधानमन्त्रीले समेत आफूले सो प्रविधि रोक्ने भनेपछि प्राधिकरणले सरकारी बजेटमा त्यसको पक्षमा लबिङ थालेको हो ।

विभिन्न सञ्चारमाध्यमबाट सशुल्क समाचार (एड्भोर्टरियल) मार्फत टेरामक्सको पक्षमा लबिङ गरेको प्राधिकरणले प्रधानमन्त्री नै त्यसको विपक्षमा उभिएपछि प्रधानमन्त्रीकै काउन्टरमा निजी संस्थालाई बजेट दिएर सोमबार गोष्ठी गर्न लागेको छ ।

प्राधिकरणले कम्प्युटर एसोसिएन नेपाल महासंघ (क्यान महासंघ) लाई गोष्ठीको सबै खर्च दिनेगरी सो कार्यक्रम आयोजना गर्न लगाएको खुलासा भएको छ । क्यानको कार्य समिति बैठकमा प्राधिकरणले सबै बजेट दिनेगरी टेरामक्सको पक्षमा गोष्ठी गर्न लागिएको भन्ने भिडिओ नेपाल प्रेसलाई प्राप्त भएको छ ।

कम्प्युटर व्यवसायीहरूको छाता संगठन क्यान महासंघको कार्यसमिति बैठकमार्फत नै निर्णय गराएर टेरामक्सको बारेमा लबिङ गर्न लागिएको भिडिओमा सुनिन्छ । सो कार्यक्रममा ‘विशेष पत्रकारहरू, प्राधिकरणका सीमित व्यक्तिहरू रहने उल्लेख छ ।

यो पनि पढ्नुस् : खुफिया एजेन्सी बन्न खोज्दै प्राधिकरण, टेरामक्स लागू भए यसरी चुहिनेछ व्यक्तिको गोप्य कुराकानी

शुक्रबार बसेको कार्यसमिति बैठकमा सो विषयमा कुनै औपचारिक एजेन्डा नभएकोमा, दूरसञ्चार प्राधिकरणले टेरामक्सको बारेमा पत्रकारहरूलाई जानकारी दिलाउन कार्यक्रम गराउन अनुरोध गरेको एजेन्डा प्रस्तुत गरिएको थियो ।

टेरामक्स विवादमा परेपछि र प्राधिकरणका उच्च अधिकारीहरूले क्यानमार्फत सरकारी बजेटमा प्रधानमन्त्रीको निर्देशनलाई काउन्टर दिन र मिडियाबाट जनमत बनाउन खोजिएको बताइएको छ । शुक्रबारको बैठकमा क्यान महासंघका महासचिव चिरञ्जीवी अधिकारीले विविधअन्तर्गत सो एजेन्डा पेश गरेका थिए ।

यो पनि पढ्नुस् : टेरामक्ससँग नेपाल टेलिकम सशंकित, ग्राहकको गोपनीयता जोगाउन खोज्दा प्राधिकरणको धम्की !

एक भिडिओ क्लिपमा महासचिव अधिकारीले भनेका छन्, ‘विविधमा टेरामक्सको बारेमा प्राधिकरणबाट आग्रह आएको छ । बढीमा ३० जना सोमबार २ देखि ४ बजेसम्म र भेन्यू फाइनल भइसकेको छैन । महासंघबाट १० जना, प्राधिकरणबाट १० जना स्पेसल पत्रकार १० जना रहने भन्नेछ । प्रधानमन्त्री कार्यालयबाट यसलाई रोक्ने भन्ने कुरा आएको छ, प्राविधिक एंगलबाट यसको बारेमा बहस गर्न महासंघले आयोजना गरोस्, सम्पूर्ण बजेट महासंघले व्यहोर्ने भन्ने आएको छ । ‘

बैठकमा कार्यक्रमको लागत कति हुने र कसले बेहोर्ने भन्ने बारेमा क्यानका सदस्यहरूबीच विवाद भएको र बजेटबारे दाहोरो कुरा भिडिओमा सुनिन्छ ।

यसैबीच दूरसञ्चार प्राधिकरणले सोमबार हुने गोष्ठीलाई गोप्य राख्न खोजेको छ । प्राधिकरणका सूचना अधिकारी सूर्यप्रसाद लामिछानेले सोमबारको गोष्ठीको भेन्यूबारे आफूलाई अझै जानकारी नभएको प्रतिक्रिया दिए ।