स्वार्थका लागि नियमविपरीत पत्र काटेपछि विवादमा तानिए बाँके स्वास्थ्य प्रमुख नरेशबाबु

रुपन्देही । स्वास्थ्य कार्यालय बाँकेका निमित्त प्रमुख नरेशबाबु श्रेष्ठले अधिकार क्षेत्रभन्दा बाहिर गएर कर्मचारीलाई सरुवाको पत्र लेखेपछि विवादमा तानिएका छन् ।

श्रेष्ठले आठौं तह अधिकृत सुनिता पौडेललाई भदौ १० गते बरबुझारथ गर्ने सम्बन्धमा पत्र लेख्दै प्रदेश मन्त्रालयको निर्देशनालयमा सरुवा भएकाले रमाना लिने प्रयोजनमा जिम्मामा भएका जिन्सी तथा नगद तत्काल बुझाउन भनेका छन् ।

सुनिता यहाँको कार्यालय प्रमुख थिइन् । उनको सरुवा दाङस्थित मन्त्रालयमा भएको छ । यो ठाउँमा नरेन्द्र अंगत सरुवा भएका छन् । तर, अंगतलाई अख्तियारले निलम्बनमा राखेको छ । यही कारण नरेश आफू निमित्त भएर बसिरहनका लागि यस्तो खेल खेलेको त्यहाँका कर्मचारी बताउँछन् । सरकारी पहुँचको भरमा श्रेष्ठले यस्तो गरेको एक कर्मचारीले बताए । नरेश र अंगत कांग्रेसनिकट कर्मचारी हुन् भने पौडेल एमाले निकट हुन् ।

निमित्त प्रमुख श्रेष्ठले नेपाल प्रेससँग कुरा गर्दै हिजोको पत्रमा गल्ती भएको स्वीकारेका छन् ।

‘यो विषय बाहिर नल्याउँदा राम्रो हुन्छ, म सोमबार नै म्याडमसँग बसेर मिलाउँछु, हिजो पत्र लेख्दा केही कमजारी भएको छ’ उनले भने ।