प्रधानमन्त्री प्रचण्डले भने झैं नागढुंगा-नौबीसे सुरुङ मार्ग निर्माण गर्दा स्थानीय समस्यामा परेकै हुन् ?

काठमाडौं । जनतासँग माओवादी अभियानको पहिलो कार्यक्रममा माओवादी अध्यक्ष तथा प्रधानमन्त्री पुष्पकमल दाहाल प्रचण्ड हिजो चन्द्रागिरी नगरपालिकाको २ नम्बर वडामा पुगे । हरेक नेता एउटा वडामा जानुपर्ने निर्णयअनुसार शनिबार प्रधानमन्त्री प्रचण्ड चन्द्रागिरी नगरपालिका २ को कार्यक्रममा सहभागी भएका थिए । उनी बोल्दाबोल्दै नागढुंगा-नौबीसे सुरुङ मार्गका आयोजना प्रमुख नवीनमान श्रेष्ठसँग मोबाइलमा कुरा गरे ।

कार्यक्रममा प्रधानमन्त्रीलाई जनार्दन शर्माले आयोजना प्रमुख श्रेष्ठ फोनमा छन् भन्दै दिएपछि प्रचण्डले आफू चन्द्रागिरी नगरपालिका वडा नम्बर २ मा आएको र यहाँका जनताले सुरुङ मार्गबाट पीडित भएको गुनासो गरेको भन्दै एक साताभित्र समस्या समाधानको उपायसहित आफूलाई रिपोर्ट दिन निर्देशन दिएका थिए ।

प्रचण्डले वडा नम्बर २ सुरुङ मार्गबाट सबैभन्दा धेरै प्रभावित रहेको र सुरुङ खन्दाको आवाजले घरहरु चर्किएको बताएका थिए ।

आयोजना प्रमुख श्रेष्ठले नागढुंगा-नौबीसे सुरुङ मार्ग निर्माणका क्रममा चर्केको घरको तथ्यांक पुनः संकलनको काम सुरु भएको बताए ।

उनले नेपालप्रेससँग भने, ‘हामीले पहिले पनि चर्केका घरहरु मर्मत गरेका थियौं । हिजो प्रधानमन्त्रीले फोन गरेर ७ दिनभित्र सुझावसहितको प्रतिवेदन लिएर आउनु भन्नुभएको छ । त्यसैअनुसार सुरुङ मार्ग निर्माण गर्दा चर्केका र क्षति पुगेका घरहरुको विवरण संकलन गर्ने कार्य सुरु भइसकेको छ । ६५ वटा घर पुराना नै थिए । भने अन्य कति घर चर्केको छ ? हामी हेरेर प्रतिवेदन बनाएर प्रधानमन्त्रीलाई बुझाउँछौं । चन्द्रागिरी नगरपालिकाको १ र २ नम्बर वडामा पानीका मुहान सुकेको कारणले करोडौं खर्च गरेर ट्ंयाकरबाट पानी ल्याएर वितरण गरिरहेका छौं ।’

धेरै खर्च गरेर २ पटक बोरिङ गर्दा पनि पानी नआएपछि ट्ंयाकरबाट पानी ल्याएर वितरण गरेको श्रेष्ठले बताए ।

साउन २२ गते नागढुंगा-नौबीसे सुरुङ मार्गको रेस्क्यु टनेल ‘ब्रेक थ्रु’ भएको थियो । केपी शर्मा ओलीले प्रधानमन्त्री हुँदा २०७६ कात्तिक ४ मा उक्त सुरुङ मार्गको शिलान्यास गरेका थिए ।

शिलान्यास भएको ४२ महिनामा निर्माण सम्पन्न गर्ने लक्ष्य राखेर काम सुरु भएको थियो । तर, कोरोना, लकडाउन र मुआब्जालगायतका अवरोधले सुरुङ मार्ग निर्माणमा ढिलाइ भएको छ ।

सुरुङ मार्ग निर्माण सम्पन्न भएर सञ्चालनमा आउन अझै डेढ वर्ष लाग्ने आयोजनाले जनाएको छ । आयोजनाले जग्गा अधिग्रहणबापत साढे ५ अर्ब रूपैयाँ मुआब्जा वितरण गरिसकेको छ । सुरुङ मार्ग ‘सुरुङ र सडक गरी कुल ५.१३ किलोमिटर लामो तीन लेनको हुनेछ । उपत्यका प्रवेश गर्ने सवारीसाधन दुई लेनबाट यात्रा गर्नेछन् भने बाहिरिने सवारीसाधन एक लेनबाट जाने बताइएको छ । यस मार्गमा सुरुङको कुल लम्बाइ २.६८८ किमि र सडकको लम्बाइ २.४५ किमि हुनेछ ।

निर्माण सम्झौताअनुसार सुरुङ मार्ग प्रवेश गर्न त्रिभुवन राजपथबाट काठमाडौंतर्फ थानकोटको बस्नेत छापसम्म २.३० किमि र धादिङतर्फ धुनीबेसीको सिस्नेखोलाबाट ५६५ मिटर पक्की सडकसमेत बनाउनुपर्ने छ ।

सुरुङमार्ग बनेपछि नौबीसे-थानकोटको झण्डै ८ किलोमिटर लम्बाइसँगै झण्डै ३० मिनेट यात्रा समय छोटिने अपेक्षा गरिएको छ । कुल २२ अर्ब रूपैयाँमा ४२ महिनाभित्र सम्पन्न गर्ने गरी जापानी कम्पनी हाज्मा-आन्द्रो जेभीले नागढुंगा-नौबीसे सुरुङमार्गको निर्माण ठेक्का लिएको हो ।

सरुङ निर्माणमा जापान सरकारको करिब १६ अर्ब रूपैयाँ सहुलियतपूर्ण कर्जामा नेपाल सरकारको समेत लगानी रहेको छ । धादिङको धुनीबेंसी नगरपालिकाको सिस्ने खोलाबाट सुरू हुने सुरुङ मार्ग काठमाडौंको चन्द्रागिरी नगरपालिका बलम्बुमा अन्त्य हुनेछ ।