निष्पक्ष छानबिन गर्न र फोनको विवरण देखाउन शारुक ताम्राकारकी आमाको आग्रह

काठमाडौं । दुई महिनाको अन्तरालमा श्रीमान र छोरा दुवै गुमाएपछि दिवंगत अभिनेता शारुक ताम्राकारकी आमा रुक्मणी ताम्राकारले निष्पक्ष छानबिन गर्न नेपाल प्रहरी प्रशासनलाई अनुरोध गरेकी छन् । छोरा सारुकको आत्महत्या भएको ५२ दिनमै श्रीमान सानु ताम्रकारको पनि निधन भएको थियो ।

श्रीमान र छोरा दुवै गुमाएपछि अहिले रुक्मणी एक्ली भएकी छन् । उनले सामाजिक संजालमा स्टाट्स लेख्दै भनेकी छन्, ‘मेरो छोरा गुमाउनुको साथै ५२ दिनमा मेरो श्रीमान पनि गुमाउँदा ममाथि ठूलो बज्रपात परेको छ । यतिका दिनसम्म पनि पुलिस प्रशासनबाट छानबिन कहाँसम्म पुग्यो भन्ने कुराको खबर न आउँदा, म सम्पूर्ण पुलिस प्रशासनलाई मेरो छोराको अन्तिम सुटिङको बेला के भएको थियो र मेरो छोराले यो कदम लियो भन्ने कुराको छानबिन राम्रोसँग गर्न अनुरोध गर्दछु ।’

उनले स्टाटसमा फोनको सम्पूर्ण विवरण प्रस्ट अगाडि ल्याउन समेत अनुरोध गरेकी छन् ।