उद्योगका ५ सहसचिवको कार्यविभाजन हेरफेर, २ जना महानिर्देशकको पदस्थापन

काठमाडौं । उद्योग, वाणिज्य तथा आपूर्ति मन्त्रालयका ५ जना सहसचिवको कार्य विभाजन हेरफेर गरिएको छ ।

सोमबारको मन्त्रीस्तरीय निर्णयानुसार ५ जना सहसचिवको कार्य विभाजन हेरफेर तथा २ जना महानिर्देशकको पदस्थापन गरिएको हो । वाणिज्य आपूर्ति तथा उपभोक्ता संरक्षण विभागमा सहसचिव तीर्थ चिलुवाललाई महानिर्देशकमा पदस्थापन गरिएको छ । उनी यसअघि अख्तियारमा थिए ।

त्यसैगरी कम्पनी रजिष्टारको कार्यालयको रजिष्टारमा सहसचिव दिवस आचार्यलाई पदस्थापन गरिएको छ । यसअघि आचार्य राष्ट्रिय सूचना आयोगमा थिए । वाणिज्य आपूर्ति तथा उपभोक्ता संरक्षण विभागका महानिर्देशक गजेन्द्र ठाकुरलाई मन्त्रालयको आपूर्ति व्यवस्था तथा उपभोक्ता हित संरक्षण महाशाखामा सरुवा गरिएको छ ।

मन्त्रालयका सहसचिव यज्ञराज कोइरालालाई प्रशासन तथा संस्थान महाशाखा, सहसचिव लीलाप्रसाद शर्मालाई बहुपक्षीय व्यापार तथा व्यापार सहायता महाशाखा, सहसचिव गोविन्दबहादुर कार्कीलाई योजना अनुगमन तथा मूल्यांकन महाशाखा, सहसचिव जीवलाल भुसाललाई औधोगिक तथा लगानी प्रवर्द्धन महाशाखाको जिम्मेवारी दिइएको छ ।

कोइराला औद्योगिक तथा लगानी प्रवर्द्धन, शर्मा प्रशासन तथा संस्थान, कार्की बहुपक्षीय व्यापार तथा व्यापार सहायता तथा भुसाल योजना अनुगमन तथा मूल्यांकन महाशाखाको जिम्मेवारीमा थिए । त्यसैगरी १९ जना उपसचिवहरूको समेत सरुवा तथा शाखागत जिम्मेवारी हेरफेर गरिएको छ ।