‘माओवादीलाई श्रमिकले खबरदारी गरेमात्र रुपान्तरण सम्भव छ’

काठमाडौं । बालाजु औद्योगिक क्षेत्रमा कार्यरत श्रमिकहरुले माओवादीलाई निरन्तर खबरदारी गर्नुपर्ने स्वयं माओवादी नेताहरुले नै बताएका छन् ।

जनतासँग माओवादी विशेष रुपान्तरण अभियान अन्तर्गत कामनपा वडा नं. १६ मा पर्ने बालाजु औद्योगिक क्षेत्रभित्रको अभियानमा बोल्दै नेकपा माओवादी केन्द्रका केन्द्रीय सदस्य जन्मदेव जैसीले भने, ‘हामी बिग्रिएकै हौं, तपाईंहरुको निरन्तर खबरदारीबिना रुपान्तरण सम्भव छैन ।’

अखिल नेपाल औद्योगिक मजदुर संघ कामना १६ बालाजु एरिया कमिटीको आयोजनामा भएको सोमबारको अभियान कार्यक्रममा प्रमुख अतिथिको रुपमा बोल्दै जैसीले श्रमिकको साथ र खबरदारीबिना आजको युग नेतृत्व गर्ने पार्टी निर्माण सम्भव नहुने सुझाए । सञ्चार क्षेत्रका श्रमिकहरुका लागि निरन्तर लड्दै आएका जैसीले भने सबै क्षेत्रका श्रमिकहरु एकीकृत हुँदै दलाल पूँजीवादी कानून र सत्ताका विरुद्ध विद्रोह गर्न अपिल गरे ।

कार्यक्रममा पार्टी प्रदेश समिति सदस्य रुपेश सिलवालले पार्टीमा मजदुर नरहने हो भने त्यो सामन्तको पार्टी ठहरिने भएकाले मजदुरहरु संगठित रुपमा निरन्तर लागिरहन आग्रह गरे । ‘खबरदारी पनि गर्नुस्, माओवादीमा संगठित हुनुस् अधिकारका लागि पनि जुट्नुस्, अनिमात्र श्रमिक वर्गको भविष्य छ’, उनले भने ।

काठमाडौं जिल्ला ७ नं. निर्वाचन क्षेत्रको प्रदेश ख का अध्यक्ष सुजन लामाले माओवादी तलबाट नभई माथिबाट बिग्रिएकाले रुपान्तरण पनि माथिबाट हुनुपर्ने भन्दै आफूहरु पनि रुपान्तरणको भट्टीमा छिरिसकेको बताए । ‘श्रमिक जनता ईमानदार छन्, हामी सच्चिनुपर्छ, फेरि जनताले विगतकै स्तरमा साथ दिनेमा हामी विश्वस्त छौं’, सुजनले भने ।

नेपाल औद्योगिक व्यवसायिक महासंघका वरिष्ठ उपाध्यक्ष श्याम श्रेष्ठले मजदुर र राष्ट्रवादी व्यवसायी मिलेर मात्र वर्गीय दूरीलाई घटाउँदै आर्थिक रुपमा मुलुकलाई समृद्धितिर लैजान बल पु्ग्ने बताए ।

अखिल नेपाल औद्योगिक मजदुर संघका केन्द्रीय उपाध्यक्ष रामजी मण्डलको सञ्चालन र खड्गबहादुर लामाको अध्यक्षतामा भएको कार्य्रक्रममासम्पर्क समन्वय प्रदेश सदस्य सम्राट, मजदुरबाटै सम्मानित पुर्व श्रमिक तथा १६ वडाका अग्रज दिलिपराज वन्त, वडाका पार्टी अध्यक्ष सुदन थापालगायतले रुपान्तरण अभियानमा पार्टीको भूमिका र जनतासँगको सम्बन्धलाई नयाँ स्तरमा गर्नुपर्ने सुधारका विषयमा धारणा राखेका थिए ।

सयौं श्रमिकहरु उपस्थित कार्यक्रममा माओवादी निकट पर्यटन व्यवसायिक संगठनका पुराना स्थापित नेता नवराज दाहाल, वडा सचिव सुजता थापा मगर, महानगर सदस्य कविता बस्नेत श्रेष्ठलगायत विभिन्न जनवर्गीय संगठनका स्थानीय नेताहरुको सहभागिता थियो ।