राष्ट्रिय क्रिकेटर किशोर महतो लिग खेल्न अष्ट्रेलिया लागे

काठमाडौं । नेपाली राष्ट्रिय क्रिकेट टिमका एक सदस्य किशोर महतो अष्ट्रेलिया प्रस्थान गरेका छन् । उनी नेपाल क्रिकेट संघ (क्यान) लाई जानकारी दिएर हिजो अष्ट्रेलिया उडेका हुन् ।

महतोले हिजै क्यानलाई इमेल पठाएका थिए । क्यान प्रवक्ता दुर्गा पाठकका अनुसार उनले देशलाई आवश्यकता परेमा कुनै पनि बेला उपलब्ध हुने प्रतिबद्धता जनाएका छन् ।

‘उहाँ क्यानको अनुमति लिएर जानुभएको हो । लिग क्रिकेट खेल्नका लागि जान लागेको भनेर इमेलमा लेख्नुभएको छ,’ पाठकले भने ।

नेपाली खेलाडीले क्रिकेटमै थप ‘एक्सपोजर’का लागि विदेश जान खोज्दा क्यानले नरोक्ने उनी बताउँछन् ।

‘यसअघि अविनाश बोहरा पनि आफ्नै पहलमा बाहिर गएर फर्किनुभएको हो । उहाँ अहिले राष्ट्रिय टिममा पनि हुनुहुन्छ । किशोर पनि जुनसुकै बेला फर्किने प्रतिविद्धतासहित जानुभएको छ । हामी उहाँलाई शुभकामना दिन्छौँ,’ पाठकले भने ।

क्रिकेट खेल्न जान लागेको बताए पनि अविनाशले कुन टिमबाट कुन स्तरको क्रिकेट खेल्दैछन् भन्ने इमेलमा खुलाएका छैनन् । अपुष्ट खबर अनुसार उनी पर्थ ग्रेड क्रिक क्लबमा एक सिजनका लागि आबद्ध भएका छन् ।

उनले तीन महिनाको अवधिमा २४ वटा म्याच खेल्न सक्ने बताइएको छ । त्यसो त कतिले उनी अब अष्ट्रेलियामै बस्न सक्ने आशंका पनि गरेका छन् । राष्ट्रिय टिमका धेरै खेलाडीले उनलाई ‘अष्ट्रेलियामा भेटौँला’ भन्दै सामाजिक सञ्जालमा पोस्ट गरेका छन् ।

फास्ट बलर किशोर हालै एसिया कपका लागि नेपाली टिममा परेका थिए । तर, पाकिस्तान र भारतविरुद्धका खेलमा उनले प्लेइङ ११ मा स्थान बनाउन सकेनन् ।

यसअघि पनि विभिन्न प्रतियोगितामा राष्ट्रिय टिममा परेका उनले मैदानमा उत्रिने अवसर भने धेरै पाएका छैनन् ।

नवलपुर कावासोतीका २३ वर्षीय किशोर सन् उमेर समूह हुँदै राष्ट्रिय टिममा आएका हुन् । तर, राष्ट्रिय टिममा उनी सिनियर बलरहरू सोमपाल कामी र करण केसीको ओझेलमा परिरहेका छन् । पाएका अवसरलाई पनि राम्ररी सदुपयोग गर्न सकेका छैनन् ।