एट्लेटिको म्याड्रिडसँग हार्‍यो रियल म्याड्रिड

काठमाडौं । स्पेनिस ला लिगा फुटबलअन्तर्गत आइतबार राति भएको खेलमा एट्लेटिको म्याड्रिडले रियल म्याड्रिडलाई ३-१ गोलले हराएको छ ।

घरेलु मैदानमा एट्लेटिकोका लागि अल्भारो मोराटाले २ र एन्टोइन ग्रिजम्यानले १ गोल गरे । रियल म्याड्रिडका टोनी क्रुजले गोल गरे पनि हार टार्न सकेनन् ।

मोराटाले चौथो र ग्रिजम्यानले १८औं मिनेटमा गरेको गोलमा एट्लेटिको खेलको सुरुवातमै २-० गोलले अगाडि बढेको थियो । ३५ औँ मिनेटमा क्रुजले गोल गरेका थिए। मोराटाले ४६औँ मिनेटमा गोल थप्दै फेरि अग्रता बढाएका थिए ।

यो सिजन रियल म्याड्रिडले घरेलु लिगमा पहिलो हार ब्यहोरेको हो । ला लिगामा उसले अघिल्ला सबै ५ खेल जितेको थियो । ६ खेलपछि बार्सिलोना र गिरोनाले १६/१६ तथा रियल म्याड्रिडको १५ अंक छ । एट्लेटिकोको ५ खेलबाट १० अंक छ ।