मैदान उत्रन संघर्षरत मेस्सी, के भएको हो ?

न्युयोर्क। लियोनल मेस्सीले पछिल्लो दुई सातामा आफ्नो टोलीले खेलेका ४ मध्ये तीन खेलमा मैदान उत्रन सकेका छैनन्। एक खेलमा पनि सुरुको ३७ मिनेटपछि मैदानबाट बाहिरिएका थिए।

पछिल्लोपटक उनी, मेजर लिग सकर (एमएलएस)को महत्वपूर्ण खेलमा सोमबार बिहान ओर्लान्डो सिटीविरुद्ध उत्रिएनन्। उनलाई वैकल्पिक खेलाडीको सूचीमा समेत समावेश गरिएको थिएन।

चार दिन अघि भएको एमएलएसकै खेलमा मेस्सीले टोरन्टो एफसीविरुद्ध सुरुवातबाट खेलेपनि पहिलो हाफ पूरा समय पनि टिक्न सकेनन्। ३७ औँ मिनेटमा बाहिरिएका मेस्सी त्यसपछि कुनै उपचार नगरी आरामपूर्वक खेल हेरेर बसेका थिए।

इन्टर मियामीका प्रशिक्षक ताता मार्टिनोले मेस्सी चोटसँग जुधिरहेको उल्लेख गरेका छन् तर उनलाई केको चोट लागेको भने खुलाएका छैनन्। दुई साताअघि राष्ट्रिय टोलीबाट खेल्दा मेस्सी घाइते भएको र त्यसैका कारण अहिले उनी मैदानमा उत्रन असमर्थ भइरहेको उनको भनाई छ।

‘यो चोट लागेको भनेर भन्दा मेस्सीलाई मानसिक असर पर्न सक्छ। तर यो कुनै नयाँ चोट होइन र मांसपेशीसँग पनि सम्बन्धित छैन। उनलाई समस्या दिइरहने पुरानै चोट हो’, मार्टिनोले भनेका छन्।

दुई साताअघि विश्वकपको दक्षिण अमेरिकी छनोटमा बोलिभियाविरुद्ध मेस्सीले खेलेका थिएनन्। त्यसको चार दिनअघि मेस्सीकै निर्णायक गोलमा अर्जेन्टिनाले इक्वेडरलाई १-० गोलले हराएको थियो। बोलिभियाविरुद्ध नखेलेपछि मेस्सी घाइते भएको अनुमान गरिएको थियो।

क्लब फुटबलमा फर्किएपछि उनले इन्टर मियामीले खेलेको पहिलो खेल खेलेका थिएनन्। त्यस खेलमा मियामी पराजित भएको थियो। मेस्सीलाई भित्र्याएयता मियामीको त्यो पहिलो हार थियो।

मेस्सीले मियामीका लागि ११ खेलमा ११ गोल र ८ असिस्ट गरेका छन्। मियामीले आगामी बुधबार यूएस ओपन कपको फाइनल खेल्दै छ। त्यस खेलमा उनी उपलब्ध हुने नहुनेबारे केही बताइएको छैन।

मेस्सीकै निर्णायक प्रदर्शनमा इन्टर मियामीले क्लब इतिहासमा पहिलो उपाधिका रुपमा लिग्स कप जितेको थियो। सोमबार बिहान भएको खेलमा मेस्सीबाहेक बार्सिलोनाका अन्य दुई पूर्वखेलाडी जोर्दी अल्बा र सर्जियो बुस्केट्स पनि मैदान उत्रिएका थिएनन्।।