रामेछापमा ठेकेदारलाई कन्स्ट्रक्सन मेनेजमेन्ट र नेतृत्वसम्बन्धी तालिम

रामेछाप । रामेछाप सदरमुकाम मन्थलीमा कन्स्ट्रक्सन मेनेजमेन्ट र लिडरसिपसम्बन्धी दुई दिने तालिम आयोजना गरिएको छ । जिल्लामा सञ्चालन हुने विकासे योजना तथा निर्माणसम्बन्धी अन्य कामलाई व्यवस्थित, पारदर्शी र गुणस्तरयुक्त बनाउनेबारे तालिम केन्द्रित छ ।

रामेछाप निर्माण व्यवसायी संघका अध्यक्ष बलराम श्रेष्ठले उद्घाटन गरेको उक्त तालिममा संघमा आवद्ध ५० जना सहभागी छन् ।

निर्माण व्यवसाय प्रवर्द्धन तथा व्यवस्थापन कार्यान्वयन समितिको प्रायोजन र रामेछाप जिल्ला निर्माण व्यवसायी संघको व्यवस्थामा आयोजित तालिमको सहजीकरण केशवराज आचार्य र विकासदेव योञ्जनले गर्दै आएका छन् ।