एमाले बागमती निर्वाचन- यी हुन् कृष्ण दाहाल प्यानलका पदाधिकारी उम्मेदवार

काठमाडौं । नेकपा एमाले बागमती प्रदेश अधिवेशनमा अन्ततः कैलाश ढुंगेल र कृष्ण प्रसाद दाहाल प्यानलबीच प्रतिस्पर्धा हुने भएको छ । पार्टीले आधिकारिकरूपमा प्यानल बनाउन निषेध गरेपनि दुवै पक्षले पदाधिकारीदेखि सदस्यसम्मको प्यानल सूची मतदातालाई बाँड्दैछन् ।

दाहाल पक्षबाट उपाध्यक्षमा नुवाकोटका पूर्वसांसद नारायणप्रसाद खतिवडा उम्मेदवार तय भएका छन् । त्यस्तै सचिवमा ललितपुरका पूर्वसांसद नवराज सिलवाल उम्मेदवार बनेका छन् ।

दाहाल पक्षबाट उपसचिवमा खुलातर्फ सिन्धुलीका खड्गवहादुर खत्री र महिलामा काभ्रेकी भक्तकुमारी लामा उम्मेदवार छन् । खत्री कमलामाई नगरपालिकाका पूर्व मेयर हुने भने भक्तकुमारी विद्यार्थी राजनीतिबाट आएकी हुन् ।

दाहाल प्यानलमा तत्कालीन १० बुँदे सहमति पक्षबाट उपाध्यक्षमा नारायण खतिवडा र उपसचिवमा भक्तकुमारी लामा उम्मेदवार बनेका हुन् । १० बुँदे पक्षले वागमतीमा करीव २४० जना प्रतिनिधि सो समूहबाट आएको दाबी गरेको छ । तर उनीहरु सबै एउटै प्यानलमा छैनन् ।

उपसचिव खुल्लामा दोलखाका डबल पाण्डे र ओमराज पन्तलाई पनि समेट्न खोजिएको थियो । तर, अन्तिममा महिला र खुल्ला क्लस्टर बनाइएपछि पाण्डेको साटो भक्तकुमारीलाई उम्मेदवार बनाइएको हो ।
उम्मेदवारको अन्तिम नामावली प्रकाशनका क्रममा प्रदेश कमिटीका सदस्यहरू केही जिल्लाबाट निर्विरोध भइसकेका छन् ।