एमाले कर्णाली चुनाव : ४ घण्टापछि सुरू भयो गणना
नेपाल प्रेस
२०८० असोज १५ गते १२:०३
सुर्खेत । नेकपा एमाले कर्णाली प्रदेशको नयाँ नेतृत्वका लागि भएको मतदानको गणना भर्खर सुरू गरिएको छ ।
बिहान ८ बजेदेखि मतगणना हुने भनिएता पनि ४ घण्टापछि गणना थालिएको हो । गोप्य मतदान भनेर प्यानलको लिस्टै बोकी खुल्मखुल्ला भोट हालिएको भन्दै विवाद भएपछि गणना विलम्व भएको थियो ।
उम्मेदवार र नेताबीच छलफलपछि गणना थालिएको हो ।
यहाँ कुल ६१६ मतदातामध्ये ६०९ जनाले भोट हालेका थिए ।
कर्णाली अध्यक्षका लागि कालीकोटका मीनबहादुर शाही, प्रकाश रोकाया र सल्यानका गुलावजंग शाह मैदानमा छन् । यस्तै, उपाध्यक्षमा जाजरकोटका लालबहादुर महतारा, मुगुका दानसिंह परियार र जुम्लाका टेकराज पछाई, सचिवमा दैलेखका रुद्रबहादुर शाही र सुर्खेतका ध्रुवकुमार शाही छन् ।
उपसचिवमा ११ जना प्रतिस्पर्धी छन् ।
सर्वसम्मत नेतृत्व चयन गर्न असफल भएपछि आइतबार साढे १ बजेदेखि मतदान भएको थियो ।
नेपाल प्रेस
प्रकाशित: २०८० असोज १५ गते १२:०३
प्रतिक्रिया
सम्बन्धित खवर
