एमाले कोशी अधिवेशन : कडा सुरक्षा घेरामा गणना सुरू

विराटनगर । नेकपा एमाले कोशी प्रदेशमा नेतृत्व चयनका लागि भएको निर्वाचनको मतगणना सुरु भएको छ । दिउँसो १ बजेबाट गणना शुरु गर्ने भनिएपनि ५ बजेबाट मत गणना सुरु भएको हो ।

मतगणना स्थलमा नेपाल प्रहरी र सशस्त्र प्रहरीले सुरक्षा दिएका छन् ।

गणना स्थलमा प्रतिनिधि भन्दा बढी सुरक्षाकर्मी तैनाथ गरिएको छ । एमाले कोशी प्रदेश इन्चार्ज रघुवीर महासेठले र ७ स्थानमा मतगणना हुने बताए । उनले जिल्ला भूगोल र पदाधिकारीको मतगणना एकै पटक हुने जानकारी दिए । उनले निर्वाचनको परिणाम आज राती आउने बताए ।

कोशी प्रदेशमा १ अध्यक्ष, १ सचिव र २ उप सचिवका लागि निर्वाचन भएको हो । यसका लागि प्यानल वाइज उम्मेद्बारी परेको छ । यस्तै, २५१ जना प्रदेस सदस्यका लागि ४२५ जनाको उम्मेद्बारी परेको छ ।

नेकपा एमाले कोशी प्रदेश कमिटीको अधिवेशनमा सहमतिमा नेतृत्व चयन हुन नसकेपछि मतदान भएको छ । कुल ९९७ जना प्रतिनिधिमध्ये ९७७ मत खसेको छ । मतदानमा २० जना प्रतिनिधि सहभागी नभएको निर्वाचन अधिकृतको कार्यालयले जनाएको छ ।

प्रदेशमा अध्यक्षका लागि मोरङको लेटाङका घनश्याम खतिवडा र विराटनगरका विनोद ढकाल चुनावी प्रतिस्पर्धामा छन् । ढकाल अहिले केन्द्रीय सदस्य छन् भने खतिवडा प्रदेशको प्रचार विभाग प्रमुख हुन् ।

यसैगरी सचिवमा पाँचथरका राजकुमार भण्डारी र उदयपुरका शैलेश लामा उमेदवार छन् ।

२ जना उपसचिवमा ३ जनाको मनोनयन परेको छ । उप सचिवमा खोटाङका देवान राई झापाकी जलवर्षा राजवङ्शी र मोरङका खेम नेपालीको मनोनयन दर्ता भएको छ ।