डोटी माओवादी सदस्यता नवीकरण र वितरण सप्ताह मनाउने

डोटी । नेकपा माओवादी केन्द्रले डोटीमा पार्टी सदस्यता नवीकरण तथा वितरण सप्ताह मनाउने भएको छ ।

तीन महिने पार्टी विशेष रूपान्तरण अभियानअन्तर्गत असोज २०-२७ सम्म यो अभियान चलाइने भएको हो । जिल्लाका ६५ वडामा सदस्य नवीकरण तथा अद्यावधिक गर्ने र नयाँ सदस्यता वितरण गर्ने जिल्ला अध्यक्ष लक्षीराम आचार्यले जानकारी दिए ।

‘हामीले पहिलो चरणमा जनता र पार्टीका नेता कार्यकर्ताबीच भेटघाट कार्यक्रम गर्‍ंयौ’, आचार्यले भने, ‘अब एक साता सदस्यता नवीकरण र नयाँ वितरणलाई अभियानकै रूपमा लैजान्छौं ।’

अभियान सकिएपछि गाउँ, टोलस्तरीय कमिटी गठन प्रशिक्षणलगायतका सांगठानिक गतिविधि सञ्चालन गरिने जिल्ला संयोजक कमलबहादुर गड्सिलाले जानकारी दिए ।

विशेष अभियानले जनतामा उत्साह सिर्जना गरेको माओवादी केन्द्रीय सदस्य लक्ष्मणदत्त जोशीले दाबी गरे ।

उनले भने, ‘हामी जनतामाझ यसरी नगएको धेरै भयो, यस पटक जाँदा कार्यकर्ताभन्दा हाम्रा समर्थक र नागरिकको बीचमा उत्साह आएको छ ।’