ओम अग्रवाल पक्राउ परेपछि दीपकराज गिरीको टिप्पणी- मान्छे त्यसै पलायन हुँदैनन्

काठमाडौं । चलचित्र ‘प्रसाद- २’को विवादमा ओएसआर डिजिटलका सञ्चालक ओम अग्रवाल पक्राउ परेपछि अभिनेता दीपकराज गिरीले सामाजिक सञ्जालमार्फत आक्रोश पोखेका छन् ।

उनले ओम अग्रवाल जस्तो हिसाबकिताबमा इमानदार मान्छेलाई कानूनी दाउपेचको चक्रव्यूहमा फसाएको भन्दै आक्रोश व्यक्त गरेका हुन् ।

उनले लेखेका छन्, ‘मान्छे त्यसै पलायन हुँदैन । चलचित्र क्षेत्रको बजार निर्माण र विस्तारमा निरन्तर लागिरहेका हिसाबकिताबमा पनि इमानदार मान्छे आज कानूनी दाउपेचको चक्रव्यूहमा फसेका छन् । छिट्टै न्याय मिलोस् ।’

आपराधिक विश्वासघात गरेको आरोपमा अग्रवाललाई प्रहरीले पक्राउ गरेको छ । चलचित्रका निर्माता सुदर्शन बस्नेतले अग्रवालसहित निर्देशक सुदर्शन थापाविरुद्ध आपराधिक विश्वासघात गरेको बताउँदै प्रहरीमा जाहेरी दिएका थिए । जाहेरीलगत्तै अग्रवाल र थापामाथि पक्राउ पुर्जी जारी गरिएको थियो ।

निर्देशक थापाको जाहेरीमा नायक अनमोल केसी पक्राउ परेका थिए ।