असिम साहको आग्रह- सरकारले इजरालमा मृतकको र बेपत्ता नेपालीको डाटा राख्ने काम मात्र नगरोस् (भिडिओ)

काठमाडौं । रास्वपाका सांसद असिम साहले नेपाली विद्यार्थीको उद्धारको लागि सरकारलाई इजरायली राष्ट्राध्यक्षसँग सीधै संवाद गर्न सरकारको ध्यानाकर्षण गराएका छन् । प्रतिनिधिसभाको बैठकमा बोल्दै नेपाली विद्यार्थीको ज्यान हमासले नभएर सत्तामा रहेका व्यक्तिहरूले लिएको उनको आरोप छ ।

उनले भने, ‘इजरायलमा १० जना नेपालीको मृत्यु भयो । तर, यो देशका छोराहरूमाथि आक्रमण त्यहाँको हमासले मात्र गरेको होइन । यहाँको सत्तामा रहेका हमास पनि जिम्मेवार छ । देशमा सीमित मान्छेको रजगज छ । देशको साधन स्रोतमा यिनै हमासको हालिमुहाली छ । देशको कानून हमासका लागि छ । देशभित्रका हमासको अत्याचार सहन नसके युवा विदेश जान्छन् । उता अर्को हमासले ज्यानै लिन्छ ।’

कहिले अफगानिस्तानको भूमिमा, कहिले इजरायलको भूमिमा, कहिले तालिवानको बमबाट निर्दोष नेपालीको स्वास खोसेको उनको भनाइ थियो ।

साहले प्रश्न गर्दै भने, ‘मृत्यु हत्केलामा बोकेर कहिलेसम्म हिँड्ने नेपाली ? यसको जवाफ र जिम्मेवारी यो देशमा ३३ वर्ष सत्तामा रहेका हमासले दिनुपर्छ र लिनुपर्छ ।’

उनले अझै केही नेपाली सम्पर्कविहीन भएको उल्लेख गर्दै भने, ‘यो देशको सरकार यहाँ इजरायली राजदूतसँग याचना गरिरहेको छ । नेपाल सरकारले सीधै इजरायली राष्ट्राध्यक्षसँग किन संवाद गर्दैन ? मृतकको लास र बेपत्ताको डाटा राख्ने काम मात्र नगरोस् ।’