कमल राईको ‘ए बरै’मा विद्या र विराजको मार्मिक अभिनय (भिडिओ)

काठमाडौं । कमल राईको ‘ए बरै’ म्यूजिक भिडिओमा भुटानी शरणार्थीका विषयमा कारुणिक दृष्य देखाइएको छ । नेपालको झापा र मोरङमा तत्कालीन समयमा रहने गरेका शरणार्थीहरु अहिले झापाको बेलडाँगीमा रहेका छन् ।

उनीहरुमध्ये अधिकांश तेस्रो मुलुक पुनर्बास कार्यक्रममा रहेर अमेरिका, अष्ट्रेलिया, क्यानडालगायतका देशमा पुगे । तर अझै पनि करिब २० हजार भुटानी शरणार्थीहरु भने नेपालमै बसेका छन् । जसको कारण भने कतिपयको भुटान आफ्नो मातृभूमि फर्कने ईच्छा त कतिपयको भने नेपालले आफूलाई स्वीकारीदेओस् भन्ने चाहना हो ।

जसका कारण पछिल्ला पिँढीका सन्ततिहरुले तेस्रो मुलुकको पुनर्बास रोजे भने आफ्ना बुबा आमा चाहिँ यतै रहे । यही अवस्थामा सन्तानसँग विछोडिनुको पीडालाई र बदलिँदो मानवीयतालाई गीतले प्रस्तुत गरेको छ ।

जसमा अग्रज कलाकार विद्या कार्की र विराज बास्कोटाको अभिनय रहेको छ । करिब दुई दर्जन बढी म्यूजिक भिडिओ, विभिन्न नाटक एवम् ‘सक्किगो नि’मा आफ्नो अभिनय तथा कला प्रस्तुत गरिसकेका विराज यस गीतमा छोराको भूमिकामा रहेका छन् । गीतमा कलाकारहरुको अभिनयलाई दर्शकहरुले रुचाएका छन् । उनीहरुले उठाएको विषयलाई पनि कमेन्टमार्फत दर्शकहरुले हौसला प्रदान गरेका छन् ।

गीतको शब्द/संगीत/स्वर तथा भिडिओको कन्सेप्ट र निर्देशन कमल राईकै रहेको छ भने मिक्सिङ किशोर थापाले गरेका छन् । त्यस्तै, गीतको छायांकन र सम्पादन योगेश दाहालले गरेका हुन् । साथै, अभिनयमा काब्या बराल र दीपक राईसमेत रहेका छन् ।