डान्सबारमा लफडा हुँदा राराबका स्ववियू सभापति मनिष यादव हिरासतमा

जनकपुरधाम । जनकपुरधामको रामसागर रामसरुप बहुमुखी (राराब) क्याम्पस स्ववियू सभापति मनिष यादवलाई प्रहरीले रातभर हिरासतमा राखेको छ ।

बुधबार राति धनुषाको ढल्केवरस्थित सम्राट डान्सबारमा युवतीको विषयमा विवाद हुँदा दुई पक्षबीच कुटाकुट भएको थियो ।

डान्सबारका सञ्चालकले यादवसहित दुवै पक्षकालाई बाहिर निकालेका थिए । झडपको क्रममा दुवैतिरका एक-एकजना घाइते भएका छन् ।

इलाका प्रहरी कार्यालय ढल्केबरको टोलीले सभापति यादवसहित केही व्यक्तिलाई नियन्त्रणमा लिएको हो ।

इप्रका ढल्केबरका प्रहरी निरीक्षक राजकिशोर साहले चोकमा दुई पक्षबीच झडप भएको बताए । झडपमा दुईजना घाइते भएको र सोही क्रममा सभापति यादवलाई नियन्त्रणमा लिएको साहले बताए ।

इन्स्पेक्टर साहले सोमबार छलफलबाट विवाद मिलाउने सहमति गरेपछि आज बिहान सभापति यादवलाई छाडिएको बताए ।

यादव नेपाल विद्यार्थी संघबाट स्ववियू सभापतिमा निर्वाचित भएका हुन् । उनले आफू पक्राउ नपरेको र बदनाम गर्ने प्रयास भइरहेको दाबी गरेका छन् ।