प्रदेश प्रमुखले संविधानविदको सल्लाह लिएर निर्णय गर्नु हुन्छ : आङवो

विराटनगर । कोशी प्रदेशको मुख्यमन्त्रीमा दाबी पेश गरेका इन्द्र बहादुर आङवोले आफूले बहुमत पुर्याएर मुख्यमन्त्रीको दाबी गरेको बताएका छन् ।

प्रदेश प्रमुखको कार्यालयमा पत्रकारसँग कुरा गर्दै उनले आफूले बहुमत पुर्याएर मुख्यमन्त्रीको दाबी पेश गरेको बताए । उनले प्रदेश प्रमुखले सबै कुरा हेरेर संविधानविदसँग सल्लाह गरेर उपयुक्त निर्णय गर्ने बताए । उनले आफूले बुझाएको प्रदेश सभा सदस्यहरुको हस्ताक्षर पुरानो नभएको बताए ।

उनले भने, ‘प्रदेश प्रमुखले आवश्यक छानबीन गरेर निर्णय गर्नु हुन्छ भन्ने बिश्वास छ ।’ उनलाई आजै सत्ता गठबन्धनले मुख्यमन्त्रीको रुपमा अघि सार्ने निर्णय गरेको थियो । उनले नेपाली कांग्रेसका २९, माओवादीका १३ एकीकृत समाजवादीका ४ र जसपाका १ जना प्रदेश सभा सदस्यको हस्ताक्षर प्रदेश प्रमुख समक्ष पेश गर्दै मुख्यमन्त्रीको दाबी गरेका हुन् ।

उनीसँगै नेपाली कांग्रेसका केदार कार्कीले पनि मुख्यमन्त्रीको दावी पेश गरेका छन् । उनलाई कांग्रेसका ८ जना प्रदेश सभा सदस्यहरुले साथ दिएका छन् । कार्कीले एमालेका उप सभामुख सहित ४० जना प्रदेश सभा सदस्यहरुको हस्ताक्षर बुझाएका छन् ।

संविधानको धारा १६८ को उपधारा ५ अन्तर्गत सरकार गठनको आह्वान भएको थियो । सो धारामा दलको ह्वीप नलाग्ने भएकाले पार्टी निर्णयको विरुद्धमा असन्तुष्टी जनाउँदै केदार कार्कीले मुख्यमन्त्रीको दावी पेस गरेका हुन् ।