सांसद विनोद चौधरीको पहलमा स्वास्थ्य मन्त्रालयले नवलपरासीमा पठायो तीन चिकित्सक

काठमाडौं । स्वास्थ्य तथा जनसंख्या मन्त्रालयले नवलपरासी (बर्दघाट सुस्ता पश्चिम) का विभिन्न तीन स्वास्थ्य संस्थामा चिकित्सक पठाएको छ । नवलपरासी-१ बाट प्रत्यक्ष निर्वाचित सांसद एवं नेपाली कांग्रेसका केन्द्रीय सदस्य विनोद चौधरीको पहलमा मन्त्रालयले तीन चिकित्सक पठाएको हो ।

मन्त्रालयका अनुसार चिसापानी अस्पताल, बर्दघाटका लागि डा. मोहम्मद रजा अन्सारी, पकलिहवा स्वास्थ्य चौकीमा डा. पंकजकुमार यादव र जगन्नाथ स्वास्थ्यचौकीका लागि डा. विपुलकुमार झालाई पठाइएको छ । तीनै जना सरकारको छात्रवृत्ति २ वर्षे करारअन्तर्गतका चिकित्सक हुन् ।

प्रतिनिधिसभा निर्वाचनका बेला नेता चौधरीले आफ्नो निर्वाचन क्षेत्रमा सहज र गुणस्तरीय स्वास्थ्य सेवाको व्यवस्था गर्ने प्रतिबद्धता जनाएका थिए । उनी निर्वाचित भएपछि चौधरी फाउण्डेसनको सहयोग र अन्य राज्यका निकायसँगको समन्वयमा स्वास्थ्य संस्थाको स्तरोन्नति र सेवा विस्तारको काम भइरहेको छ ।

स्वास्थ्य मन्त्रालयले तीन जना एमबीबीएस चिकित्सक पठाउने निर्णयले नवलपरासीका नागरिकले आफ्नै ठाउँमा गुणस्तरीय स्वास्थ्य सेवा पाउने विश्वास लिइएको छ ।