बंगलादेशविरुद्धको म्याचमा भारतका हार्दिक पाण्ड्या घाइते, उपचारका लागि लगियो

काठमाडौं । विश्वकप क्रिकेट अन्तर्गत भारत र बंगलादेशबीच जारी म्याचका क्रममा भारतीय अलराउन्डर हार्दिक पाण्ड्या घाइते बनेका छन् । उनी बलिङ गर्ने क्रममा गोलीगाँठोमा चोट लागेपछि उनलाई मैदानबाट हटाएर उपचारका लागि लगिएको छ ।

खेलको नवौं ओभरमा पाण्ड्या आफ्नो पहिलो ओभर बलिङ गर्न आएका थिए । ओभरको दोस्रो र तेस्रो बलमा उनलाई बंगलादेशी ओपनर लिट्टन दासले लगातार चौका प्रहार गरे । तेस्रो बल फ्याकेपश्चात फलो थु्रका क्रममा पाण्ड्याको गोडा दोब्रिएर लडेका थिए । त्यसपछि फिजियोले आएर निकै बेर उनलाई हेरे । पाण्ड्याले उठेर खेल्ने प्रयास गरे पनि दुखाइका कारण सफल भएनन् । त्यसपछि उनलाई बाहिर लगिएको थियो ।

पाण्ड्याको ओभरका बाँकी दुई बल विराट कोहलीले फ्याके । पाण्ड्या आजको म्याचमा नफर्किने घोषणा गरिएको छ । उनलाई स्क्यानका लागि लगिएको बीसीसीआइले जनाएको छ । उनको स्क्यान रिपोर्ट हेरेपछि मात्रै भारतका आगामी म्याचहरुमा उनी उपस्थित हुने/नहुने बारे चिकित्सकले राय दिनेछन् ।

पाण्ड्या भारतीय टिमका महत्वपूर्ण सदस्य हुन् । विष्फोटक ब्याटिङका लागि चिनिने उनी विश्वकपमा बलिङ पनि राम्रो गरिरहेका छन् । उनी आगामी म्याचमा खेल्न सकेनन् भने भारतका लागि ठूलो धक्का हुने छ ।