शिल्पाका पतिले ट्विटरमा लेखे- हामी अलग भयौं

काठमाडौं । बलिउड अभिनेत्री शिल्पा शेट्टीका पति राज कुन्द्राले आफूहरु छुटिएको आफ्नो ट्विटर अकाउन्टमार्फत जानकारी दिएका छन् । उनले स्टाट्समा आफूहरु छुटिएको सन्दर्भ मात्र उल्लेख गरेका छन् । तर कारणहरु भने खुलाएका छैनन् ।

उनले लेखेका छन्, ‘हामी अलग भएका छौं। र, यो कठिन समयमा हामीलाई केही समय दिन सबैमा विनम्र अनुरोध गर्दछौं ।’

उनले पोस्ट गरेको सो ट्विटले धेरैलाई सोच्न बाध्य बनाइरहेको छ भने कतिले उनको पोष्टलाई प्रचारात्मक नौटंकीको संज्ञासमेत दिइरहेका छन् ।

राजले सोही पोस्टको स्क्रिनसट इन्स्टाग्राम स्टोरीमा पनि शेयर गरेका छन् ।

सन् २००९ मा शिल्पा शेट्टीसँग विवाह बन्धनमा बाँधिएका कुन्द्राका दुई सन्तान छन् । उनी सन् २०२१ को जुलाईमा पोर्नोग्राफीसम्बन्धी मुद्दामा पक्राउ परेका थिए । उनको यो मुद्दा सो वर्षकै सबैभन्दा ठूलो विवादित बन्यो । उनलाई मुम्बईको अर्थर रोड जेलमा राखिएको थियो ।

करिब दुई महिनाको जेल बसाइपछि महानगरीय मजिस्ट्रेटले जमानत दिएपछि उनी सोही वर्षको सेप्टेम्बरमा बाहिरिएका थिए । उनीमाथि भारतीय दण्ड संहिता (आईपीसी) सूचना प्रविधि ऐन र महिलाको अशोभनीय प्रतिनिधित्व (रोकथाम) ऐनको सम्बन्धित धाराहरूअन्तर्गत मुद्दा दायर गरिएको थियो ।