कांग्रेस सभापतिको घरमा जुवा प्रकरण: इन्स्पेक्टरको नेतृत्वमा छानबिन समिति गठन

दाङ । जुवाको खालबाट इलाका प्रहरी कार्यालय हेकुलीका सई भीमबहादुर रावतसहितको टोलीले पैसा लुटेको घटनामा छानबिन समिति गठन गरिएको छ ।

जिप्रका दाङको निर्देशनमा इप्रका तुलसीपुरले प्रहरी निरीक्षक नवचन्द्र मल्लको नेतृत्वमा ३ सदस्यीय छानिबन समिति गठन गरेको हो । छानिबन समितिमा हवल्दार मधु केसी र जवान रामशंकर चौधरी छन् ।

इप्रका तुलसीपुरका इन्चार्ज डीएसपी ठाकुर पोखरेलका अनुसार छानबिन समितिलाई २ दुई दिनभित्र प्रतिवेदन पेश गर्न निर्देशन दिइएको छ ।

सई रावतको नेतृत्वको प्रहरीले नेपाली कांग्रेस तुलसीपुर उपमहानगर समितिका सभापति सुरेश हमालको दंगीशरण ३ रावतगाउँस्थित घरबाट कात्तिक १ गते राति जुवा लुटेको आरोप लागेपछि छानबिन समिति गठन गरिएको हो ।

नेपालप्रेसले सई रावतसहित सहायक हवल्दार बेलबहादुर बोहोरा र जवान हिमाल शाहीले जुवाको खालबाट ८० हजार रूपैयाँ लुटेर भागेको समाचार सार्वजनिक गरेको थियो ।