बझाङमा जीप दुर्घटना हुँदा एक जनाको मृत्यु

कैलाली । बझाङमा जीप दुर्घटना हुँदा एक जनाको मृत्यु भएको छ । जिल्लाको छबिसपाथिभेरा गाउँपालिका-७ मा भएको जीप दुर्घटनामा परी गम्भीर घाइते भएका बुड्खोरीका इनार महतको मृत्यु भएको जिल्ला प्रहरी कार्यालय बझाङले जानकारी दिएको छ ।

टाउको र कम्मरमा चोट लागेर गम्भीर घाइते भएका महतको उपचारको क्रममा जिल्ला अस्पतालमा मृत्यु भएको जिल्ला प्रहरी कार्यालय बझाङका प्रमुख प्रहरी नायब उपरीक्षक भरत शाहले जानकारी दिए ।

उनका अनुसार भाँडे बजारबाट बुड्खोरी जाँदै गरेको सुदूरपश्चिम प्रदेश ०१००१ ज १२६६ नम्बरको जीप आज बिहान छबिसपाथिभेरा-७ खोरीमा दुर्घटना भएको थियो । जीपमा सवार ८ मध्ये ६ जना घाइते भएको प्रहरी नायब उपरीक्षक शाहले जानकारी दिए ।

घाइते ६ मध्ये एक जनाको अवस्था गम्भीर रहेको छ । उनलाई थप उपचारको लागि धनगढी रिफर गरिएको छ ।