मूर्ति सेलाउन जाँदा खोलामा बेपत्ता युवा २४ घण्टा बित्दासम्म भेटिएनन्

रूपन्देही । दुर्गाको मूर्ति सेलाउने क्रममा खोलामा डुबेर बेपत्ता भएका रूपन्देही कोटहीमाई-१ अमरगंजवाका २० वर्षीय सन्तकुमार राजभर अझै भेटिएका छैनन् ।

मंगलबार दिउँसो दानव र तिनाउ नदी संगममा तीन युवा डुबेकोमा दुईजनाको मृत्यु भएको थियो । रूपन्देही प्रहरीका अनुसार सन्तकुमारसँगै खोलामा डुबेका स्थानीय २४ वर्षीय अजयकुमार नाउ र १८ वर्षीय अजय राजभरको मंगलबार दिउसो शव भेटिएको थियो । प्रहरी जवान अजय राजभर दसैँ मनाउन घर आएको कोटहीमाई-१ का वडाअध्यक्ष ब्रह्मदेव यादवले बताए ।

खोलामा बेपत्ता सन्तकुमार मंगलबार रातिसम्म फेला नपरेपछि बुधबार बिहानैदेखि खोजी सुरू गरिएपनि भेटिएको छैन । स्थानीयबासी, नेपाल प्रहरी, सशस्त्र प्रहरीलगायतको टोलीले दुईमुहान क्षेत्रमा खोजी गरिरहेको छ ।

जिल्ला प्रहरी कार्यालय रूपन्देहीका एसपी भरतबहादुर विश्वकर्माले बेपत्ता रहेका सन्तकुमारको खोजी बिहानैदेखि जारी रहेको बताए ।

रूपन्देही, नवलपरासी र कपिलवस्तुका दक्षिणी क्षेत्रमा दसैँताका स्थापना गरिएका दुर्गामूर्ति विसर्जन गर्ने क्रममा विगतका वर्षमा पनि डुबेर युवाहरूको मृत्युका घटना हुने गरेको थियो ।