भारतीय सांसद मोइत्राले घुस लिएर संसदमा प्रश्न सोधेको आरोप, कसरी जोडिए ‘घायल प्रेमी’ ?

काठमाडौं । नरेन्द्र मोदी सत्ताको तीखो आलोचना गरेर संसदमा धेरै मन्त्रीहरुलाई समेत असिनपसिन पार्ने एक भारतीय प्रभावशाली सांसद अहिले विवाद र छानबिनको घेरामा छिन् । कडा सवाल गर्ने प्रष्ट वक्ता र आकर्षक व्यक्तित्वका कारण मिडियामा छाइरहने त्रृणमूल कांग्रेसकी सांसद महुआ मोइत्रा अहिले कठघरामा छिन् र उनको आफ्नै पार्टीले पनि बचाउ गरेको छैन ।

मोइत्रामाथि व्यापारी व्यवसायीसँग पैसा लिएर संसदमा प्रश्न गर्ने गरेको गम्भीर आरोप लागेको छ । अहिले उनीमाथि लागेको आरोपको छानबिन भइरहेको छ र यो प्रमाणित भएमा लोकसभा सदस्य पद नै खारेज हुनसक्छ ।

उनीमाथि भारतीय चर्चित र विवादास्पद कारोबारी गौतम अडानी र उनका व्यापारिक कम्पनीहरुमाथि निशाना बनाएर लगातार संसदमा प्रश्न गरेको र त्यो गरेबापत अर्को व्यापारिक घरानाबाट घुस लिने गरेको आरोप छ ।

मोइत्रामाथि यो आरोप सत्तारुढ भारतीय सांसद निशिकान्त दुबेले लगाएका थिए । उनीहरुबीच यसअघि पनि सदनमा नोकझोक हुने गरेको थियो । मोइत्राले आफूमाथिका आरोप अस्वीकार गरेकी छन् । यसबारेमा जाँच कमिटी बनिसकेको छ ।

मोइत्रामाथि रियल स्टेटदेखि ऊर्जालगायत विभिन्न क्षेत्रमा कारोबार गर्न हीरानन्दानी समूहका सीईओ दर्शन हीरानन्दानीले अडाणी समूहको बारे संसदमा प्रश्न सोध्न घुस लिने गरेको आरोप लागेको छ । हीरानन्दानीले हालै सो दाबी गरेका थिए ।

संसदको आचारसंहिता समितिले निशिकान्त दुबेले महुआ मोइत्रामाथि लगाएको आरोप र उजुरीमाथि छानबिन गरिरहेको छ । यता मोइत्राको पार्टी त्रृणमूल कांग्रेसले जाँच कमिटीको रिपोर्टपछिमात्र केही भन्न सकिने भन्दै उनको प्रतिरक्षा गर्न अस्वीकार गरेको छ ।

दिदी ममता बनर्जीको दल त्रृणमूल कांग्रेसकी सांसद मोइत्रा संसदमा निकै प्रभावशाली मानिन्छिन् । तर, यस पटक उनीमाथि गम्भीर आरोप लागेको छ र पार्टीले समेत प्रतिरक्षा नगरेपछि उनी एक्लै परेको भारतीय सञ्चारमाध्यमहरुले जनाएका छन् ।

मोइत्राले भने आफू जाँच कमिटीको सामना गर्न तयार रहेको भन्दै आफ्नो चरित्र हत्याको प्रयास भएको बताएकी छन् । उनले यस्ता आरोपबाट चुप लागेर अडानीका मुद्दा उठाउन नछाड्नेसमेत बताएकी छन् ।

भारतमा गौतम अडानी विवादास्पद व्यापारी हुन् । राहुल गान्धीलगायत विपक्षीले समेत मोदी र अडानीबीचको सम्बन्धमाथि प्रश्न उठाउँदै भारतीय जनताको अर्बौं रुपैयाँ व्यक्तिलाई दिइएको बताउँदै आएका छन् ।

घायल प्रेमीका कारण विवाद

मोइत्राविरुद्ध लोकसभा अध्यक्षसमक्ष उजुरी दिने बीजेपी सांसद दुबेले आफूलाई जय अनन्त देहाद्राइ नामका वकिलले आरोप पुष्टि हुने प्रमाण दिएको जिकिर गरेका छन् ।

दाहाद्राइ उनै पात्र हुन्, जसलाई महुआ मोइत्रा आफ्ना ‘जिल्टेड एक्स’ अर्थात निराश पूर्वप्रेमी बताउने गर्छिन् । जिल्डेट एक्स भन्नाले एउटा रोमान्टिक सम्बन्ध अकस्मात र नराम्रो ढंगले अन्त्य भएपछिको पूर्वप्रेमी वा प्रेमिका भन्ने बुझिन्छ ।

ती वकिलले पछिल्ला दिनमा मोइत्रामाथि उनको घरमा पालेको कुकुर हेनरीको अपहरण गरेको आरोपसमेत लगाएका थिए ।
मोइत्राले भने आफ्ना निराश पूर्वप्रेमीको बयानका आधारमा बीजेपीले आफूलाई ‘बदचलन’ (चरित्रहीन) महिला साबित गर्न चाहेको बताएकी थिइन् । अडानीमाथि प्रश्न उठाउन नदिन आफूमाथि चरित्रको प्रश्न उठाइने गरेको उनको भनाइ थियो ।

को हुन् मोइत्रा ?

यसअघि पश्चिम बंगालको विधायक बनेकी मोइत्रा सन् २०१९ को आमनिर्वाचनबाट पहिलोपटक केन्द्रीय संसदमा पुगेकी हुन् । उनको जन्म असाममा भएको थियो भने कोलकातामा अध्ययन गरेकी उनी अमेरिकाबाट पढाइ सकेर फर्किएकी थिइन् ।

बेलायतमा केही वर्ष काम गरेर सन् २००९ मा भारत फर्केकी मोइत्रा पश्चिम बंगालबाट राजनीतिमा लागेकी थिइन् । उनी २०१६ मा विधानसभा सदस्य भएकी थिइन् । २०१९ मा कृष्णानगर सीटबाट उनी केन्द्रीय संसदमा निर्वाचित भइन् ।

केन्द्रीय संसदमा आएपछि ४९ वर्षीय उनी आफ्नो भाषण, व्यक्तित्व र भाजपा सत्ताविरुद्ध प्रश्न उठाएर राष्ट्रिय व्यक्तित्व बनिन् । उनी केन्द्रीय संसदमा आफ्नो पहिलो भाषणबाटै राष्ट्रियमात्र नभएर अन्तर्राष्ट्रिय मिडियाको नजरमा परेकी थिइन् ।

सन् २०१९ जुनमा संसदमा पहिलोपटक भाषण गर्दै बीजेपीका कारण संविधान खतरामा रहेको र भारतमा फाँसीवादको शुरुआती लक्षण देखिएको बताएकी थिइन् । मोदी सरकारका कारण भारतमा पछिल्लो समय जातीय तथा धार्मिक घृणा फैलिएर फाँसीवादको अभ्यास भइरहेको छ ।

उनको भाषणमा तत्कालै भाजपा सांसदहरुले आपत्ति जनाएका थिए भने त्यही बेलादेखि उनी बीजेपी र दक्षिणपन्थी शक्तिहरुको निशानामा थिइन् । सामाजिक सञ्जालमा उनको लाइफ स्टाइल र निजी जिन्दगीको बारेमा समेत प्रशस्त प्रश्नहरु उठाइने गरेको छ ।

उनी कहिले सिगार र स्याम्पेन पिएको तस्विर सोसल मिडियामा राखेर चर्चामा आउँछिन् भने कहिले उनका महँगा कपडा र पर्समाथि समेत प्रश्न उठाइने गरिन्छ ।