दुई वर्षपछि बाबर आजमको ताज खोसियो, शुभमन गिल पहिलो वरियतामा

काठमाडौं । आइसीसीको विश्व वरियतामा पाकिस्तानी ब्याट्सम्यान बाबर आजमको दुई वर्षभन्दा लामो वर्चश्व समाप्त भएको छ । उनलाई पछि तान्दै भारतका शुभमन गिल पहिलो स्थानमा उक्लिएका छन् ।

ब्याट्सम्यानको शीर्ष वरियतामा स्थान बनाउने गिल चौंथो भारतीय ब्याट्सम्यान हुन् । उनीभन्दा अगाडि सचिन तेन्दुलकर, महेन्द्रसिंह धोनी र बिराट कोहलीले मात्रै पहिलो वरियताको स्वाद चाखेका थिए । गिलले यस वर्ष एकदिवसीयमा उत्कृष्ट प्रदर्शन गरिरहेका छन् । उनले २६ खेलमा ६३ को औसतमा १४४९ रन बनाएका छन् भने उनको करिअर औसत पनि ६१।०२ रहेको छ ।

अर्कोतर्फ बाबर पनि खराब फर्ममा भने छैनन् । जारी विश्वकपमा पनि उनले चारवटा अर्धसतक बनाइसकेका छन् । तर, बाबर र शुभमानबीचको अन्तराल निकै साँघुरो भएकाले प्रदर्शनमा अलिकति तलमाथि हुनासाथ बाबर पछि पर्ने स्थिति थियो । अहिले शुभमानको रेटिङ प्वाइन्ट ८३० र बाबरको ८२४ छ । एक–दुई म्याचमा बाबरको प्रदर्शन राम्रो र शुममानको खराब भयो भने फेरि उलटफेर हुन सक्छ ।

व्याटिङ वरियतामा भारतका बिराट कोहली चौंथो स्थानमा उक्लिएका छन् । विश्वकपमा दुई अविजित शतक र चार अर्धसतक हानेपछि उनले तीन स्थानको फड्को मारेका हुन् । उनी तेस्रो स्थानमा रहेका क्वीन्टन डिककभन्दा एक रेटिङ प्वाइन्टले मात्रै पछाडि छन् । पाचौं नम्बरमा डेभिड वार्नर र छैटौंमा रोहित शर्मा छन् ।

यता, बलिङतर्फ पनि भारतकै वर्चश्व छ । पाकिस्तानका साहिन साह अफ्रिदीको शीर्ष वरियता केही दिनमै भारतका मोहम्मद सिराजले खोसेका छन् । विश्वकपको पछिल्लो म्याचमा साहिनले खराब प्रदर्शन गरेपछि उनी एकैपटक पाचाैँ स्थानमा झरेका हुन् । दक्षिण अफ्रिकाका केशव महाराज दोस्रोमा, अष्ट्रेलियाका एडम जाम्पा तेस्रोमा र भारतका कुलदीप यादव चौंथो स्थानमा छन् ।