रेशमको आममाफीविरुद्धको पेसी स्थगित, छाडिएका अन्य ३ को भने सुनुवाइ हुने

कैलाली । नागरिक उन्मुक्ति पार्टीका संरक्षक रेशम चौधरीलाई कैद मिनाहा गर्ने सरकारको निर्णयविरुद्ध परेको मुद्दाको सुनुवाइ स्थगित भएको छ ।

टीकापुर घटनाकै अर्को मुद्दामा भने सुनुवाइ हुने भएको छ । चौधरी रास्ट्रपतिबाट आम माफी पाएर जेठ १५ गते रिहा भएका थिए । १६ गते उक्त कदम बदरको माग सहित रिट दर्ता गरिएको थियो । टीकापुर घटनामा मारिएका प्रहरी इन्स्पेक्टर केशव बोहराकी पत्नी शारदा कठायतले माफी मिनाहाविरुद्ध सर्वोच्च अदालतमा रिट दिएकी थिइन् । आज उक्त पेसी स्थगित भएको हो ।

सोही घटनामा जेल परेर असोज ३ मा माफी मिनाहा पाएका थप तीनजना विरुद्धको रिटमा भने आज सुनुवाइ हुने भएको छ । टीकापुर घटनामा तीनै तहको अदालतबाट दोषी ठहर भएका अन्य ४ चारजनालाई सरकारले असोज ३ गते रिहा गरेको थियो । तीमध्ये एक नाबालक हुन् ।

नाबालक बाहेक अन्य तीनजना विरुद्ध पनि रिट परेको थियो । आज रेशम चौधरीको मुद्दामा सुनुवाइ स्थगित भएपनि अन्य तीनजनाको माफी मिनाहा बदरको माग गरी दिएको रिटमा सुनुवाइ हुने अधिवक्ता इन्द्र अर्यालले जानकारी दिए । उक्त पेशी प्रकाशमान सिंह रावलको इजलासमा परेको छ ।