न्युजिल्यान्ड सेमिफाइनल नजिक, कसरी सम्भावना कमजोर भयो पाकिस्तान र अफगानिस्तानको ?

काठमाडौं। न्युजिल्यान्ड जारी एकदिवशीय विश्वकपको सेमिफाइनल नजिक पुगेको छ।

बिहीबार भएको लिग चरणको आफ्नो अन्तिम खेलमा न्युजिल्यान्डले श्रीलंकालाई ५ विकेटले पराजित गर्‍यो। ९ खेलबाट १० अंक भएको न्यूजिल्यान्ड तालिकाको चौथो स्थानमा छ।

८ खेलबाट समान ८ अंक भएका अफगानिस्तान र पाकिस्तानभन्दा न्यूजिल्यान्डको नेट रनरेट निकै राम्रो छ। अफगानिस्तान र पाकिस्तानले आफ्नो अन्तिम खेल जितेपनि न्यूजिल्यान्डलाई पछाडि पार्न निकै गाह्रो छ।

न्यूजिल्यान्डलाई पछाडि पार्न अफगानिस्तानले दक्षिण अफ्रिकालाई ४ सय ३८ रन र पाकिस्तानले इङ्ल्यान्डलाई २ सय ८७ रनले हराउनुपर्ने छ।

श्रीलंकालाई एक सय ६० बल बाँकी रहँदै खेल जितेर न्युजिल्यान्डले नेटरनरेट बलियो बनाएको हो। भारत, दक्षिण अफ्रिका र अस्ट्रेलिया यसअघि नै सेमिफाइनल पुगिसकेका छन्।

न्युजिल्यान्ड सेमिफाइनलमा पुगेको अवस्थामा भारतसँग खेल्ने छ। अर्को सेमिफाइनलमा दक्षिण अफ्रिका र अस्ट्रेलिया भिड्नेछन्।