घरमा आगलागी हुँदा आमाछोराको मृत्यु

पोखरा । गोरखामा गएराति घरमा आगलागी हुँदा आमाछोराको मृत्यु भएको छ । गोरखा धार्चे गाउँपालिका– १ हुल्चोककी ७५ वर्षीया कान्छी गुरुङको १ तले घरमा आगलागी हुँदा कान्छीसहित २ जनाको मृत्यु भएको जिल्ला प्रहरी कार्यालय गोरखाले जनाएको छ ।

आगलागीमा परेर कान्छीसहित उनका छोरा ३९ वर्षीय चन्द्रसिंह गुरुङको मृत्यु भएको गोरखाका प्रहरी प्रमुख एसपी अनुपम श्रेष्ठले जानकारी दिए ।

आगो ताप्ने क्रममा आगलागी भएको हुनसक्ने प्रारम्भिक अनुसन्धानबाट खुलेको एसपी श्रेष्ठले बताए ।

‘एक कोठे घर रैछ, घरभित्र सालको काठ पनि रैछ । घरमा २ जना हुनुहुने रैछ । दुबैको मृत्यु भएको छ । प्रहरी टोली घटनास्थलमा पुगिसकेको छ । प्रारम्भिक अनुसन्धानमा रातको समयमा आगो ताप्दै गर्दा आगलागी भएको देखिन्छ’, उनले भने ।

इलाका प्रहरी कार्यालय आरुघाटबाट प्रहरी निरीक्षक नरबहादुर साउदसहित टोली पुगेर घटनाबारे थप अनुसन्धान कार्य भइरहेको प्रहरीले जनाएको छ ।