दुर्गा प्रसाईंको अस्पतालले रिफर गर्न आनाकानी गरेका १० जना बिरामीको नेपाली सेनाद्वारा हवाई उद्धार

काठमाडौं । नेपाली सेनाले १० जना आगोले पोलेका घाइतेको हवाई उद्धार गरेको छ ।

यही कात्तिक २६ गते मोरङको उर्लाबारी- ७ बरगाछीस्थित दीपक कार्कीको घरमा आगलागी हुँदा निभाउन गएका चार जना प्रहरी र २३ जना सर्वसाधारणसमेत २७ जनामध्ये तत्काल झापाका अस्पताल लगिएका १० जनालाई आज नेपाली सेनाको विमानद्वारा चन्द्रगढीबाट काठमाडौं ल्याइएको हो ।

कार्कीको घरमा भएको आगलागीमा घाइते भएका १४ जनालाई हिजो सोमबार नेपाली सेनाको विमानद्वारा विराटनगरबाट काठमाडौं ल्याइएको थियो ।

ती १० जना बिरामीलाई दुर्गा प्रसाईंको अस्पताल बीएण्डसीबाट काठमाडौं ल्याइएको हो । ती बिरामीको उपचारमा लागेको खर्च भुक्तानी नभएसम्म उनीहरुलाई रिफर गर्न अस्पतालले आनाकानी गरेको थियो ।

कोशीका मुख्यमन्त्री केदार कार्की आफै अस्पताल पुगेर ती बिरामीहरुलाई थप उपचारको लागि काठमाडौं पठाउन समन्वय गरेका थिए ।