पूर्ववडाध्यक्ष डिल्ली अधिकारीको अर्को गीत बजारमा

भोजपुर । डिल्लीराम अधिकारीको स्वरमा नयाँ गीत ‘नर्कको मलामी’ बजारमा आएको छ । भोजपुरको अरुण गाउँपालिका-७ का पूर्ववडाअध्यक्ष तथा गत स्थानीय निर्वाचनमा गाउँपालिका अध्यक्षमा माओवादीका उम्मेदवारसमेत रहेका अधिकारीको यो दोस्रो गीत हो ।

अधिकारीले गत असोज अन्तिम साता ‘खाडीको लाहुरे’ बोलको गीत भिडिओसहित बजारमा ल्याएका थिए । ‘खाडीको लाहुरे’ मार्फत् उनले गायनमा डेब्यू गरेका हुन् ।

उनको नयाँ गीतमा राजनीतिक दल र नेताको कार्यशैलीप्रति कटाक्ष गरेका छन् । गणतन्त्रविरोधी र जनताका समसामयिक सवाललाई पनि उनले गीतमा पस्किएका छन् । अधिकारीकै रचना रहेको उक्त गीत काठमाडौंको तारकेश्वर नगरपालिकाको गोलढुंगामा छायांकन गरिएको छ ।

एनपी म्युजिक मिडिया युट्युव च्यानलबाट सार्वजनिक गीतमा मनिपाल राईले संगीत भरेका छन् । गीतमार्फत् उनले विदेशिएका युवालाई फर्केर देश विकासमा जुट्न समेत आह्वान गरेका छन् ।