सिरहामा दुई मोटरसाइकल आपसमा ठोक्किँदा एकै वडाका तीन जनाको मृत्यु, एक गम्भीर

जनकपुरधाम । सिरहा नगरपालिकामा पर्ने सन्हैठामा दुई मोटरसाइकलमा आपसमा ठोक्किँदा एकै वडाका तीन जनाको मृत्यु भएको छ भने एकजना गम्भीर घाइते भएका छन् ।

हुलाकी सडकमा पूर्वबाट पश्चिमतर्फ जांदै गरेको स २ प ४७३१ नम्बरको मोटरसाइकल र विपरित दिशाबाट आएको प्रदेश २-०१-००१ प १८५० नम्बरको मोटरसाइकल आपसमा ठोक्किएको हो ।

उक्त घटनामा तीन जनाको मृत्यु र एकजना घाइते भएको सिरहाका प्रहरी प्रवक्ता डिएसपी रविन्द्रराज पाण्डेले जानकारी दिए ‌।

उनका अनुसार अर्नमा गाउँपालिका ५ का २७ वर्षीय दिनेश कुमार यादव, ३२ वर्षीय रामबृक्ष यादव र १९ वर्षीय मुकेश सिंहको मृत्यु भएको छ । सोही ठाउँका १५ वर्षीय यूवराज कुमार यादव गम्भीर घाइते भएका छन् ।

घाइते यूवराजको उपचार सिरहा प्रादेशिक अस्पतालमा सम्भव नभएपछि थप उपचारका लागि विराटनगरको न्यूरो अस्पताल रेफर गरिएको डिएसपी पाण्डेले जानकारी दिए ।

को कुन मोटरसाइकलमा सवार रहेको कुरा खुल्न सकेको छैन् । तीव्र गतिका कारण मोटरसाइकल अनियन्त्रित भएर ठोक्किएको हुनसक्ने प्रहरीको अनुमान छ ।