सोसल मिडिया भाइरल नब्यश्रीको पहिलो सर्ट फिल्म महाकाली डिसेम्बर १० मा आउँने

भोपाल । सामाजिक सञ्जालबाट चर्चामा आएकी मोडल तथा नायिक नव्यश्री अभिनित पहिलो सर्ट फिल्म ‘महाकाली’को स्ट्रिमिङ आगामी डिसेम्बर १० मा हुने भएको छ ।

निर्माण टिमले केही दिनअघि फिल्मको पोस्टर सार्वजनिक गरिसकेको छ । भारतको सुन्दर सहर दार्जिलिङकी मोडेल नव्यश्री पछिल्लो समय सामाजिक संजालबाट चर्चित कलाकार हुन् ।

फिल्म आगामी डिसेम्बर १० अर्थात् मंसिर २४ गतेदेखि ओएसआर डिजिटल युट्युब च्यानलमार्फत स्ट्रिमिङ हुने उनले बताइन् । सार्वजनिक पोस्टरमा फिल्मकी शीर्ष अभिनेत्री नव्यश्रीलाई देवी महाकालीको रुपमा चित्रण गरिएको छ ।

काजिश श्रेष्ठ निर्देशित सर्ट फिल्मले आफ्नो कष्टपूर्ण जीवनबाट मुक्ति पाउन दुई युवतीले गर्ने संघर्ष र देवी महाकालीको भक्तिको कथा प्रस्तुत गर्छ । फिल्ममा नव्यश्रीका साथै लोमस शर्माको पनि मुख्य भूमिका छ ।

नब्यश्रीले नेपाल प्रेससँग भनिन्–‘सोसल मिडियामार्फत धेरैले मलाई माया गर्नुभयो । अब फिल्मलाई पनि माया दिनहुनेछ भन्ने विश्वास छ । लामो समयदेखि फिल्ममा करिअर बनाउन लागिरहेको छु, पहिलो कोसिसस्वरुप यो सर्ट फिल्म हो । मलाई नेपाली दर्शकहरुबाट ठूलो आशा छ ।

१४ वर्षकै उमेरमा मोडलिङ करिअर सुरु गरेकी नव्यश्रीले सन् २०१८ मा १५ वर्षको उमेरमा प्लानेट मिस इण्डिया वर्ल्ड, मिस टिन रिपब्लिक अफ इण्डिया र मिस नर्थइस्टको उपाधि जितिसकेकी छन् । सामाजिक सञ्जालमा आफ्ना पोस्टहरू सेयर गर्न थालेसँगै उनी चर्चामा आएकी हुन् । वास्तविक नाम मञ्जु थापा रहेकी नव्यश्री हाल भारतमै बसोबास गर्दै आइरहेकी छन् । उनको पुर्ख्यौली घर भने विराटनगर हो ।

सर्ट फिल्म ‘महाकाली’लाई नव्यश्रीकै लेखन तथा निर्माण छ भने फिल्मलाई अर्जुन तिवारीले खिचेका हुन् । श्रीधर अधिकारीको संगीत, सरोज श्रेष्ठको कोरियोग्राफी, एलिना चौहानको स्वर रहेको फिल्मलाई मिलन विश्वकर्माले सम्पादन गरेका हुन् ।